மாற்றி யோசிப்போம் அல்லது முறையாக யோசிப்போம்

பொதுவாக நாம் அனைவருமே ஆடம்பரமாக எதையும் செய்வதில்லை என்று சொல்லிக்கொள்ள முடிவதில்லை. காந்தி குறைந்த அளவு ஆடைகளை வைத்துக்கொள்ளுங்கள் என்றார். நான்கா வைத்திருக்கிறோம் ? நாற்பது வைத்திருந்தும் போதவில்லை புதியதாய் எடுக்கிறோம். புதிய வீட்டில், கூட ஒரு அறை இருந்தால் போதுமெனத்தோன்றி 8 வருடம் போகவில்லை இன்னும் ஒரு அறை இருந்தால் என்று யோசிக்கிறது மனம். அழகாய் இருக்குமே சேண்டிலியர் தொங்கவிடலாமே என்கிறார் காண்ட்ராக்டர். அவசியப்படாத ஒரு விளக்கும் எரியாத வீட்டில் நாலு விளக்கு ஒரே நேரத்திலா ? என்ன நடக்கிற காரியமா? ஐயா தொலைச்சுவிடுவார்கள் என்று நழுவிக்கொண்டோம்.


அன்றாட வாழ்க்கையிலேயே ஆடம்பரங்கள் சூழ்ந்துவிட்டது. கல்யாணத்தில் எப்படி ?என் தோழி ஒருத்தி ஏழைப் பெண்களுக்கு திருமணத்திற்கு வருடந்தோறும் 10000 உதவிக்கொண்டிருப்பதாக அறிந்தேன். நினைத்துப் பார்க்கும் போதே எனக்கு அது அசாத்தியமான செயலாகப்பட்டது. எத்தனை பெண்கள் வரதட்சணையால் பாதிக்கப்படுகிறார்கள். தவிர்க்க இயலாத காரணத்தால் இன்னமும் சமூகத்துக்கு இப்படிப்பட்ட உதவிகள் தேவைபடுகிறது.

மொய் வேண்டாம் என்கிற அழைப்பிதழ்களை இன்று பல இடங்களில் காண்கிறோம். ”யாரோ வருவார்கள் கட்டாயத்திற்காக மொய் வைப்பார்கள் அதை நான் வெறுக்கிறேன்” என்று சொல்வார் ஒரு தோழி. வாழ்த்தி அளிக்கும் விதம் போய், சடங்கோடு சடங்காக மொய்சடங்கும் ஆகிவிட்டது. பல அழைப்பிதழ்கள் மனதைக் கவர்ந்திருக்கின்றன. நல்லுள்ளங்களுக்கு வாழ்த்துக்கள் ’மை ப்ரண்ட் அனு ’ தானாகவே தயாரித்த ஒரு வாழ்த்து மடல் ஒன்றை அழைப்பிதழில் இணைத்திருந்தார்.

அய்யனார் கவிதையால் நிரப்பி இருந்தார் தன் அழைப்பிதழை...
குசும்பனும் காயத்ரியும் இன்று ராமும் தமிழ் பாடல்களை அழைப்பிதழில் இட்டு பலருக்கு தமிழ் மேல் ஆர்வத்தை உண்டாக்கிக் கொண்டிருக்கிறார்கள் .







நேற்றைய பதிவு எழுதிக்கொண்டிருக்கும்போதே தமிழ்பிரியனிடம் அதைப்பற்றி விவரித்துக்கொண்டிருந்தேன். அப்போது தான் அருகில் நடக்கும் நன்மையொன்றை கவனிக்கத்தவறியதை உணர்ந்தேன். அவருடைய திருமணப் பத்திரிக்கையைப் பாருங்கள். 12 வருடங்களாக வரதட்சணை வாங்கும்\கொடுக்கும் திருமணங்களுக்கு செல்வதில்லையாம். வாயிலில் வரதட்சணை வாங்கும் திருமணங்களுக்கு அழைப்பிதழே தரவேண்டாம் என்று கூட எழுதி வைத்திருக்கிறார்களாம். ஆச்சரியத்திலும் ஆச்சரியம்.

ஆனால் இப்படி ஒரு பத்திரிக்கையை நீங்கள் பார்த்திருக்கிறீர்களா? இருந்தால் அதனையும் பகிர்ந்து கொள்ளுங்கள். நல்லதொரு மாற்றத்திற்கு நன்மையை பலமுறை பல இடங்களில் சொல்வது தவறே இல்லை.

ஆனால் ஆடம்பரங்கள் என்று இன்று சொல்லும் வருத்தப்படும் எவரும் நாளை தங்கள் வீட்டில் ஆடம்பரங்களை நிகழ்த்தாமல் இருப்போமோ என்பது முத்துலிங்கம் அவர்கள் சொன்னது போல ஐயம் தானே? பதிந்து வைப்போம். முயன்று பார்க்கலாம். இயன்றவர்கள் செய்யலாம்.