வானவில் இற்றைகள் அக்டோபர் 2011

உலகக்கோப்பை இறுதிப்போட்டிக்கு முன்னும் கிரிக்கெட் பிடிக்கும் விளையாடுவான் பேசுவான் . ஒருமுறை நேராக என் மூக்கைப்பார்த்து பந்தை இறக்கி, அதிலிருந்து ”அம்மா உங்கள் மேல் அடிக்கமாட்டேன் வாங்க விளையாடலாம்” என்பான். இறுதிப்போட்டியில் வெற்றிக்கோப்பையைப் பெற்ற உடன் தெருமுனையில் டோல் அடித்து குழு நடனங்கள் நடந்தது. இதுநாள் வரை பூஸ்ட் க்கு கிடைத்த கிரிக்கெட் மட்டைகளை வைத்து விளையாண்டு கொண்டிருந்தவர் புது மட்டைக்கு அடிப்போட்டார். நான் மறுக்க அப்பா வாங்கிக்கொடுத்துவிட்டார்கள். அவர்கள் அடுத்தவர்களுடையது வைத்து விளையாடிய நினைவு வந்து மகனின் கனவை நினைவாக்கி விட்டார்கள். அது கிடைத்ததும் அடுத்து இந்தியா டீசர்ட்டுக்கு அடிபோட்டார். அது இவர் அளவுக்கு கிடைக்காததால் ஒருவருசம் போகட்டும் உடம்பைத் தேத்தப்பா என்று சொல்லிவைத்தேன்.

கடைக்கு செல்லவேண்டியதினத்தில் சீக்கிரமே எழுந்து அம்மா அப்பாவுக்கு குட்மார்னிங்க் வைத்து எல்லாரையும் கடைக்கு தயாராகச்செய்து ..என்ன ஒரு நல்லபையன்.

புது கிரிக்கெட் பேட் வாங்கியபின் விளையாட விடாமல் ஒரு நடன அரங்கேற்றம் பார்க்க அழைத்துச்செல்ல ஒரே அழுகை . விடுமுறையில் விளையாட விடவில்லையே .” நாங்கள் சிறுபிள்ளையாக இருந்தபோது விடுமுறை நாட்களில் கோயிலுக்கு வார வழிபாடு என்று அழைத்துச் செல்வார்கள். (கொஞ்சம் பெரிசானதும் நாங்கள் குறைத்தோம் தான்) காரிலா போனோம்? நடந்து போனோம்” என்று வழக்கமான அறிவுரையைக் கேட்டுக்கொண்டிருந்தான். டீவி இல்லை , கார் இல்லை,ஃபிரிட்ஜ் இல்லை என்று சொன்ன கதைகளை அடிக்கடிக் கேட்டுக்கேட்டு கடுப்பாகி

அப்பறம் எப்படித்தான் வாழ்ந்தீங்க?

”ஏன் அது எல்லாம் இல்லாம வாழமுடியாதா என்ன? முடியும்டா?
இருக்கிற அத்தனை விளையாட்டு சாமன்களையும் வைக்க இடமில்லை. மேலும் மேலும் கேட்பதை நிறுத்து ” என்று அடுத்த அறிவுரை..... அவன் படுத்து தூங்கிவிட்டான், பின்சீட்டில்...
----------------------------------
தலைமுடியை எப்பப்பாருங்க க்ரோஷா பின்னல் போல சுற்றிக்கொண்டே இருப்பான். முன் பக்கம் செய்வதால் யாரிடமாவது பேசும்போது அப்படி சுழட்டுவது பார்க்க நன்றாக இல்லை.  ஏண்டா அப்படி செய்கிற  என்று கேட்டால்  அது மகிழ்ச்சியைக்கொடுப்பதா சொல்வான் ( மஜா ஆரஹாஹெ )

முடிவெட்டிவிட்டு வந்த நாள் ....உடையில் எதோ ஒரு நூலைப் பிடித்து அதே போல சுற்றிக்கொண்டிருந்தான். என்னடா அதை விட்டு இப்ப இதா என்று கேட்ட என்னிடம் ஒரு கேள்வி கேட்டான். அதைக்கேட்டதும் எனக்கு இதயமே வலித்தது. என்னவா?

‘ அம்மா இதும் எனக்கு மகிழ்ச்சியா இருக்குன்னு சொன்னா நீங்க எடுத்துடுவிங்களா..? ‘

நான் என்ன அவன் மகிழ்ச்சியைவா பிடுங்கறேன். ஹ்ம்.. :(  உன்னை நாலு பேர் ஸ்மார்ட் பாய் ந்னு அப்பத்தானே சொல்வாங்க..இப்படி முடியை சுத்திட்டிருந்தா என்ன பையன் இவன்னு சொல்வாங்களே அதுக்குத்தானே சொன்னேன் என்று புரியவைக்க முயற்சித்தேன். ஆமா முயற்சித்தேன்னு தான் சொல்லனும். முடிந்ததா என்று தெரியல.

-------------------------------
புது புது ஹிந்தி அல்லது ஆங்கில வார்த்தைகள் தெரிந்துகொண்டால் அது ஒரு வாரகாலம் அதே வைத்து தான் பேசுவது வழக்கம். பெஹோஷ் மயக்கம் என்று ஒரு வார்த்தை தெரிந்தது. அம்மா சீக்கிரம் வாங்க இந்த கேம் ல நான் எவ்ளோ பாயிண்ட் எடுத்திருக்கேன் தெரியும..? ம் சொல்லுப்பா.. கேட்டா நீங்க பெகோஷ் ஆகிடுவீங்க.. என்று சொல்லிவிட்டுத்தான் பாயிண்ட் எவ்ளோ என்று சொல்வது. இப்போதெல்லாம் நான் கூப்பிட்டால் சீக்கிரம் சொல்லு பெகோஷ் ஆகி விழனும்ல்லன்னு சொல்லிட்டு கீழே விழப்போகும் மாதிரி நிற்பது கண்டு அவனுக்கு ஒரே வெட்கம். ரொம்ப அதிகமாப்போனா அம்மா ந்னு ஒரு கோவம்..
-------------------------------------------
महानो का यह पवित्र देश‌
अब क्यो बदल रहा है अपना वेश?
स्वतंत्र तो हो गये है मगर,
कब छाएगा एकता का अम्बर?
இது என் மகள் அவளோட பள்ளி கையெழுத்துப் பத்திரிக்கைக்காக எழுதியது.

ஹிந்தியில் கவிதை வேணும் என்றதும்.. எல்லாரும் இவளை கைகாட்டி இருக்காங்க..நான் ஆங்கிலத்தில் தான் எழுதுவேன் என்று சொன்னதும்..டீச்சர் அதெல்லாம் ஹிந்தியிலும் வரும் ட்ரை செய்யு என்று சொல்லிட்டாங்களாம்..
வந்து என்ன எழுத எழுத ந்னு தொணத்தொணத்தா எழுதுடி எதயாச்சும் எழுதிட்டு காமி சொல்றேன்னேன்..

அப்பறம் எதோ எழுதினா. நம்ம தேசம் , இதோட மன்ணுன்னு ஒரே பெருமையா இருந்தது கவிதையில்..இதே மாதிரி தானெ எல்லாரும் எழுதிட்டு வருவாங்க..கவிதை எழுதினா அதுக்கு உண்மையா இருக்கனும்.. எழுதனுமேன்னு இருந்தா எழுதாதே வரலைன்னு சொல்லிடு டீச்சருக்குந்னு சொல்லிட்டேன்.. அதோட வராதுனு கவலையில் முகத்தைத் தூக்கிவச்சிட்டிருக்காதே ..
இதை எடுத்துட்டுபோ இன்னும் ஒரு நாள் டைம் கிடச்சா வேற எழுதுன்னேன்.. அதே மாதிரி வகுப்பில் எல்லாரும் அதே மாதிரி எழுதி இருக்கவும் திரும்ப வந்தா..

என்ன எழுதனுமோ அதை ஆங்கிலத்தில் எழுது அப்பறம் அதுக்கான வார்த்தைய ஹிந்தியில் தேடுன்னேன்.. கவிதைய சமைக்கச்சொன்னேன்..:)) திருத்தி எழுதப்பட்டது ..
டீச்சர் இதை நீதான் எழுதினியா மண்டபத்துல வாங்கிட்டுவந்தியான்னு எல்லா வார்த்தைகளுக்கும் அர்த்தம் கேட்டுக்கிட்டாங்களாம்..:))

மகான்களால் நிறைந்த இந்த புண்ணியதேசம்
ஏன் கலைக்கிறது அதன் வேஷம்
சுதந்திரம் வந்துவிட்டது ஆனால்
எல்லாரும் சமமென்ற வானம் விரிவதெப்போது ?
- இது நான் என் அறிவுக்கு அதை மொழிபெயர்த்திருக்கிறேன்..
---------------------
தூங்கிட்டிருந்தவளை எழுப்பி ’அன்ஷுல் நம்பர் சொல்லும்மா..’
’போன்ல தானேடா இருக்கு.. ’
’அன்ஷுல் 4 மணிக்கு என் வீட்டுக்கு விளையாடவா..’
6 மணிக்கு ’அன்ஷுல் உன் வீட்டுக்கு போற டைமாகிடுச்சுல்ல..வா நானும் உன்கூடவே உன் வீட்டுக்கு வரேன்..’
’
’அம்மா அன்ஷுலுக்கு அவன் வீட்டுக்குப்போனும் கொண்டுவிடு..
நானும் அப்படியே போறேன்..’
’டேய் யாருடா திரும்ப 7 மணிக்கு கூட்டிடுவருவா.. ’
’நீதான்மா..’
நானில்லைன்னு தலையாட்டிட்டிருக்கும்போதே..
கிரிக்கெட்ல அவுட் செய்துட்டா பவுலர் செய்ய்ரமாதிரி எல்போ மடக்கி.. எஸ் ந்னு கத்திக்கிட்டே

‘ நான் உன் வீட்டுக்கு வரேன் அன்ஷுல்..’
----------------------------------------------
’தாயே பராசக்தி என்னைக்காப்பாத்தும்மா ‘- நான்..

என்னைத்திட்டரதுக்குத்தானேம்மா சக்தி கேக்கரே.. என்னை அடிக்கிறதுக்குத்தானே - குட்டிப்பையன்

அவ்....
----------------------------
ஷாப்பிங் போன இடத்துல குட்டிப்பையன் சொன்னதை நான் வாங்கலைன்னு , ப்ளே ஏரியால விளையாட விடலைன்னு ஒரே சண்டை.. நிருலாஸ் ல சாப்பிடப்போனா ,அங்க வரைக்கும் முகத்தை உம்முன்னு வச்சிக்கிட்டு.. பேசினா பேசாம..நான் உக்காந்திருக்கும் டேபிளில் எதிர்சேர்ல கூட உக்காரமாட்டானாம்.. உன் கூட பேசமாட்டேன் ந்னு சொல்லிட்டு எங்க டேபிள் ,அத்தை மாமா உக்காந்திருந்த டெபிள் எல்லாம் சுத்திட்டு அப்படியே திரும்ப வந்து , நீங்க எப்பவும் என் பேச்சுக்கேக்கறதில்ல., எப்பவும் திட்டறீங்கன்னு சொல்லிக்கிட்டே மடியில் ஏறி உக்காந்தாச்சு..

ஏ ஒருத்தன் என்கிட்ட பேசமாட்டேன்னு சொன்னானே அவன் எங்கே ?
இப்ப அவன் அவ்வ்..:))

வானவில் இற்றைகள் - ஜனவரி 2011

இற்றைகள்* - அப்டேட்ஸ்

அந்தந்த நாட்களின் என் அனுபவங்களில் பகிர்ந்துகொள்ளப்பட வேண்டியவற்றை குழந்தைகளிடமும் பேசுவது வழக்கம். டிவிட்டரில் தமிழ்நாடு மீனவர்களுக்காக அனைவரும் #tnfisherman  என குறிப்பின் கீழ் இணைந்து ஊடகத்தால் தங்கள் கவலைகளைப் பகிர்ந்துகொள்வதையும் ஆனால் தொலைக்காட்சி ஊடகத்தில் அவை வராதது பற்றியும் நானும் மகளும் பேசிக்கொண்டிருந்தோம்.
அதிரடியாக அவள் சொன்னாள்.

”டீவிக்காரங்களுக்கு யாராச்சும் லவ் செய்து தற்கொலை செய்துகொண்ட பையனைப்பற்றிப் பேசவே நேரம் போதாது. அவங்க எங்க உருப்படியா வேலை செய்யப்போறாங்க.. அவங்க பொலிட்டிக்கல் ஆளுங்களோட சேர்ந்துட்டாங்கம்மா “ 

இந்த வாரம் தான் நொய்டாவில் ஒரு ஷாப்பிங்மாலின்  நான்காவது மாடியிலிருந்து ஒரு பையன் கீழே விழுந்து இறந்துவிட்டான். அவளுடைய தோழிகள் எல்லாம் அதுபற்றியே பேசிக்கொண்டிருந்திருக்கிறார்கள். மேலும் இது போன்ற ”நடந்தது என்ன?” எனும் மிரட்டும் பிண்ணனியோடு வரும் நிகழ்வுகளையே அவர்கள் விரும்பிப் பார்ப்பதாகவும் சொல்லிக்கொண்டிருந்தாள்.

------------------
பீம்சிங் ஜோஷி இறந்துவிட்டார் என்ற செய்தியைப்பற்றிப் பேசிக்கொண்டே இணையத்தில் அவர் படத்தைப் பார்த்துக்கொண்டிருந்தோம். தலையைத் திருப்பி சின்னவர் பார்த்தார். மீண்டும் காண்பிக்கச்சொல்லிப் பார்த்துவிட்டு. ..
வயசாகி நாமளும் செத்துப்போவோமா?
ஆமா
அப்பறம் திரும்பி பிறப்போமா?
ஆமா
அப்பன்னா நான் திரும்பி பிறக்கறதுக்கு முன்னயே நீங்களும் அப்பாவும் பிறந்துடுவீங்கன்னான்..
ஏண்டா அப்படி ?
அப்பறம் தான் நான் பிறப்பேன்.

அடுத்த ஜென்மத்துலயும் எங்களுக்கே மகனாக பிறக்க ஆசைப்படுகிறானே என்ன பேறு பெற்றோம்.


---------------------------
எங்கள் பகுதியில் குடியரசு தினவிழாக்கொண்டாட்டத்தில் மகன் லெமன் ஸ்பூனில் 3 வது பரிசும்
மகள் ம்யூசிக்கல் சேர் ல் 2 வது பரிசு.

தனியாக அக்காவும் தம்பியும் சென்றார்கள், வென்றார்கள், வெங்கலம் மற்றும் வெள்ளிமெடல்களுடன், வந்தார்கள்.
---------------------
ஆங்கிலமற்றும் கணித பயிற்சி ஏடுகளில் மூன்று நட்சத்திரம் எப்போதும் கிடைத்துவிடுகிறதாம்.
ஹிந்தியில் மட்டும் இரண்டு தான் என்று வருத்தப்படுவான். சின்னதாக ஒரு விசயம் நாம் மாற்றினாலும்
“ அய்யோ அந்த டீச்சர் அடிக்கடி கோவப்படுவாங்க இப்படி எதும் செய்யாதீங்க “ என்று பயப்படுவான்.

உன்னை இதுவரை திட்டியதில்லையே அப்பறம் ஏன்? என்றாலும் ஒரு குழப்பமான முகபாவம் தான் .
பள்ளியின் ஆசிரியர் சந்திப்பு தினத்தில் ஹிந்தி ஆசிரியை வேறு ஒரு தளத்தில் இருப்பதால் உங்களுக்கு எதுவும் பேச வேண்டுமானால் சென்று சந்திக்கலாம் என்று சொன்னார்கள்.
புத்தகக்கண்காட்சி ( பள்ளியில் ஆசிரியரை சந்திக்கும் தினத்தில் வைப்பார்கள் வியாபார உத்தி) செல்லும் ஆவலுடன் கூட,ஆசிரியையை சந்திக்கும் பயமும் சேர்ந்து கொள்ளவோ என்னவோ
”நான் தான் ஹிந்தி நல்லா படிக்கிறேனே எதுக்கு பார்க்கனும்.”
:)
------------------
புத்தகக்கண்காட்சியில் ஆக்டிவிட்டி செய்கிற புக் வேண்டாம் அதுபோல நிறைய வீட்டில் இருக்கிறது என்று நான் மறுத்ததற்கு ..
நான் கந்தி (கெட்ட) அம்மா ஆகிவிட்டேன்..

டிஸ்னியின் தி ஜங்கல் புக் வாங்கினான். அக்கா அடிக்கடி புத்தகம் வாங்கினாலும் முடித்துவிட்டுத்தான் மறுவேலை பார்ப்பாள் என்பதால் அவளைக்காட்டி நீ புத்தகம் வாங்கக்கூடாது. இனி இந்த புத்தகத்தை முழுதாக வாசித்துக் காண்பி அதற்குப் பிறகு தான் அடுத்த புத்தகம் என்று வேறு சொல்லிவிட்டேன். கொஞ்சம் ஆதங்கம் தான் .
------------------------
சபரியின் தளம் புதிய இடத்திற்கு மாற்றப்பட்டுள்ளது. அவருடைய நடனநிகழ்ச்சியின் காணொளி இற்றைப்படுத்தப்பட்டிருக்கிறது.

வானவில் இற்றைகள்

க்ரீஈஈன் - gr... ee n
சபரியின் வகுப்பில் டிக்சனரி செய்யராங்க.. தினமும் 5 புது வார்ட் எழுதவேண்டும். இன்று ஜி யில் தொடங்குவது. நான் அவனுக்கு ஒலியின் நீளம் புரியட்டும் என்று ஈ ஈ என்று சொன்னதும்..
டபுள் ஈ யா
ஆமாம்
அப்ப டபுள் ஈ ந்னு சொல்றதுக்கென்ன ?
:(
-----------------------------------------------------------
’பேபி என்று என்னைச் சொல்லாதே’ என்று அக்கா சொன்னாலும், தம்பி அக்காவை நோ பேபி , கம் பேபி என்று போனமாதங்களில் அழைத்துக்கொண்டிருந்தார்.
ஏண்டா இனி அவ தான் பேபியா நீ இல்லையா.. நீ அப்ப அண்ணா
இனி அவளைத்தான் கொஞ்சனும் வீட்டில் எல்லாரும்..ஒகேயா?
ஓகே
ஒரு ஆறுவருசம் அவளை தனியாக ராணி மாதிரி பார்த்தாச்சு .. இப்ப ஆறுவருசம் ஒன்னைப்பாத்தாச்சு திரும்ப அவ டேர்ன் போலயே..?
எங்கள் பேச்சைக் கேட்டுக்கொண்டிருந்த மகளின் முகம் பளிச் பளிச்
ஏக்கம்?
------------------------
மகள் சிறுவயதில் 11 மணி வரைகூட புத்தகமும் ரைம்ஸும் படிப்பாள் என்று சொல்லி இருக்கிறேனில்லயா . நம்மையும் படித்துக்காட்டச்சொல்லி நச்சரிப்பாள். மகனை உக்காரவைக்கப் பாடு படவேண்டும். அதற்காகச் சொல்லிக்கொண்டிருந்தேன்.
‘இவன் அப்படியே உல்டா உன்னை மாதிரி இல்லை ‘
மகள்: ’ அம்மா அப்ப இவன் பெரிசானதும் நல்லாப் படிப்பானோ’
அப்பா: அப்ப நீ ஒத்துக்கிறியா இப்ப சரியாப் படிக்கிறதில்லன்னு :)
மகள் :அவ்
-----------------------------------------
வாரம் ஒரு விசயம் பற்றி எடுத்துகொண்டு வகுப்பின் நடுவில் நின்று பேசவேண்டும் என்பது சபரிக்கு வகுப்பில் ஒரு பயிற்சி முறை.
போனவாரத்தில் மைசெல்ஃப் பற்றிப் பேசவேண்டும். தயார் செய்த நான்கு வரிகளை பயிற்சி எடுக்க விருப்பமே இல்லை. அவ்வப்போது விளையாட்டின் நடுவே பயிற்சி எடுத்தாலும் அவை அத்தனை போதாது என்று தெரிந்தே இருந்தது. ஆனால் அவனைப் போட்டு பயமுறுத்தும் எண்ணமும் இல்லை. புதன் அன்று சரியாகச் சொல்ல இயலவில்லை. டீச்சர் ‘நோ வெரிகுட்’ என்று சொல்லிவிட்டார்கள் என்று வருத்தப்பட்டான். மீண்டும் நாளை சொல்லலாம் என்றார்கள் இன்று பயிற்சி கொடு என்று அவனேக் கேட்டுக்கொண்டான். :)
இரண்டாவது வரியில் இருந்த ஒரு புது வார்த்தை சொல்ல வராமல் போகவே மற்ற வரிகளைச் சொல்ல தயக்கம் இருந்திருக்கிறது. பிறகு தயார் செய்த எந்த வரியும் அடுத்த வரிக்கு முன்போ பின்போ அல்லது சொல்லாமல் விட்டாலோ பொருள் குற்றம் வரப்போறதே இல்லை. அவ்ளோ சிம்பிள் என்று அவனுக்கு தைரியம் குடுத்தபின் ..வெரிகுட் வியாழன் கிடைத்துவிட்டது.
இந்த வாரம் ’மை மதர் ‘ இதற்கும் பயிற்சியின் போது சுணக்கம் இல்லாமல் பயிற்சி எடுத்துக்கொண்டதோடு இரண்டு முறை சொல்லிப்பார் என்றால் 3 மூன்று முறை என்று உற்சாகமாகவும் இருந்தான்.
மற்ற பையன்கள் பேசியது புரிந்ததா என்ன பேசினார்கள் என்ற கேள்விக்கு பதில்
அவங்க எல்லாம் முஷ்கில் முஷ்கிலா ப் பேசினாங்க.. :)
முஷ்கில் - கஷ்டமான
அடுத்தவாரம் தலைப்பு . என் பள்ளிக்கூடம்
--------------------------------------------
மகளுக்காக ஃபார்ம்வில் விளையாட ஆரம்பித்தேன். இன்னுமா உனக்கு அதுல ஆர்வம் வரலை என்று கேட்டுக்கொண்டே இருந்தாள். சின்னதாக எனக்கு ஆர்வம் வந்ததை கண்டுகொண்டாள் ஒரு நாள். குட் என்று பாராட்டினாள். எனக்கு அவளே கற்றுக்கொடுத்தாள். அடுத்த லெவலுக்கு நான் முன்னேறும்போதெல்லாம் ‘வாவ்’ குட் அம்மா என்று பாராட்டுகிறாள். அவளின் பாராட்டுதலுக்காகவாவது நான் அடுத்தடுத்த லெவலுக்குப் போகவேண்டும் எனத்தோன்றுகிறது.
----------------------------------
வீ கேம் அம்மா பரிசளித்திருந்தார்கள். அரைமணி நேரம் அதற்கு ஒதுக்கப்படும். டென்னிஸ் விளையாடுவதில் வீட்டில் எல்லாரும் பயிற்சி எடுத்துக்கொண்டிருக்கிறோம். தனக்காக உருவாக்கப்பட்ட கேரக்டரில் மட்டும் தான் விளையாடுவார் தம்பி. பௌலிங் மற்றும் டென்னிஸில் அவர் தான் வெற்றி பெறுகிறார்.
--------------------------
சபரி முடிந்தவரை எழுத்துக்கூட்டி கதை புத்தகங்களை வாசிக்கமுடிகிறது.
ஒரு பல் விழுந்துவிட்டது. தான் பெரியவனாகிவிட்டதாக பெருமிதம் கொண்டான்.தன் பிறந்தநாளுக்காக ஆவலுடன் காத்திருக்கிறார்
-----------------------------------
மகளின் பள்ளியில் வால்ட்விட்மேனின் கவிதையை பாடலாக இசையமைத்துப் பாடச்சொல்லி இருந்தார்கள். அவளுடைய  தளத்தில்  அனுபவத்தை பதிவு செய்திருந்தாள்.


யூ ட்யூபில் அப்பாடலை  வரிகள் கீழே தெரியும்படி தமிழ்பிரியன் வடிவமைத்ததை இங்கே காணலாம் (கேட்கலாம்). க்ளாஸிக்ன்னு போட்டிருக்கீங்களேன்னு கேட்டா சினிமான்னாலும் எங்கூர் சினிமால்லா க்ளாசிக் லிஸ்ட்ன்னுட்டார் தமிழ்பிரியன்.
நன்றி  தமிழ்பிரியன்.

வானவில் இற்றைகள் *

(இற்றைகள்* = அப்டேட்ஸ்)

தூங்குவதற்கு முன்பு சில நாள் கலந்துரையாடல் நடக்கும். அப்போது குட்டிபையனுக்கு விதவிதமான கேள்விகள் தோன்றும்.. பெரியவளுக்கு விதவிதமான கதைகள் கேட்பதில் விருப்பமிருந்தது ஒருகாலத்தில்.

கேள்வி: அம்மா நீ பூடி(வயதானவள்) ஆனதும் கூட சமைச்சுத்தருவியா எனக்கு ?

ம் ஆமாடா ஏன்?
கேள்வி : அக்காவும் சமைப்பாளா?
ஏண்டா அவள் சமைக்கனும்.. என்று கேட்டுவிட்டு பின், சரிதான் அவளுக்கும் உனக்கும் சேர்த்தே தான் சொல்லித்தருவேன் சமைக்க.. ஒருநாள் நீ ஒருநாள் அவள் சரியா?

கேள்வி: அப்ப நாம மூணுபேரும் சமைக்க அப்பா மட்டும் சாப்பிடுவாங்களா?
அட அவங்களுக்கும் சிலதெல்லாம் சமைக்கத்தெரியுமே அதெல்லாம் அவங்களை செய்ய சொல்லலாமேடா..
கேள்வி: அப்ப நாம நாலு பேருமே சமைச்சா யாரு சாப்பிடுவது..

நாம தான் ..மாத்தி மாத்தி சாப்பிட்டுக்கலாம் வேணா யாரையாச்சும் கூப்பிட்டு சாப்பாடு குடுக்கலாம்..

ம் சரி..கொர் கொர்
-----------------------
கேள்வி: அம்மா ராத்திரி பல் தேய்க்கும் போது மூக்கில் தண்ணி ஏறிடுச்சு ..அந்த தண்ணி எங்க போகும்?
ம் தொண்டை கிட்ட சாப்பாடு போற பைப் கூட ஒரு கனெக்சன் இருக்கு அது வயிற்றுக்குள்ள போயிடும்..
கேள்வி: அய்யோ வாஷ்பேசின் தண்ணி அழுக்குத்தண்ணி அதை குடிக்கக்கூடாதுன்னியே? இப்ப என்ன ஆகும் ? :(

அதெல்லாம் ஒன்னும் ஆகாது ..இன்னிக்குத்தான் பால் , சாப்பாடு எல்லாம் நல்லா சாப்பிட்டியே அதனால் உள்ள ரத்தத்துல இருக்கிற ஃபைட்டர் செல் எல்லாம் சண்டைபோட்டு கிருமிய கொன்னுடும்

ஓ அப்ப சரி கொர் கொர்..
-------------------------
டைக்வாண்டோவில் சேர்ந்து ஒருவருடத்திற்குள் மஞ்சள் மற்றும் பச்சை பெல்ட் கள் வாங்கி விட்டார்.. ஒயிட் பெல்ட் ஆரம்பநிலைக்கானது.

கேள்வி: அம்மா அக்காக்கும் ஆசையா இருக்காம் டைக்வாண்டோ..அப்ப அவ ஒயிட் பெல்ட் ஆகிடுவாளா?

ஆமா ஒயிட் பெல்ட் இப்பத்தானே சேரப்போகிறா..

நான் க்ரீன் பெல்ட(பெருமையுடன்)..சொல்லித்தருவேன் அக்காக்கு..

எதிர்வீட்டில் போய் ஆச்சி தாத்தா ப்ரண்ட் துருவ் எல்லாருக்கும் எங்கக்கா ஒயிட் பெல்ட் நான் க்ரீன் என்று காலையில் பந்தாவாக சொல்லிவிட்டு வந்தான்.

அக்காவைப்பார்த்து தம்பி பாடவும் ஆடவும் விரும்பியது போக ..தம்பியைப்பார்த்து அக்காவுக்கு இந்த ஆசையோ அல்லது அடிவிழும் வேகம் பார்த்து தன்னை தற்காத்துக்கொள்ளவோ :)

------------------------------
பள்ளியில் விட்டுவந்த நோட்காக ஒரே அழுகை..அதில் ஹிந்தி வீட்டுப்பாடம் இருந்ததாம்..டீச்சர் மேல் ஓவர் மரியாதையும் பயமும் அழுகைக்கு காரணம்.. அவன் அழுவதை சகிக்காத போது இத்தனை ஒழுக்கமாக இருக்கனுமா என்று வருந்தினேன்.
----------------------------
பக்கத்துவீட்டு தோழன் துருவ், இவன் வாங்கிய பொம்மையைக் காட்டி அவன் ஒன்று வாங்கி இருப்பான். அதைக்காட்டி நம்மை வாங்கித்தர சொல்லி இவன்... (டீலிங்க் நல்லா இருக்கே..)

பொம்மையிலிருந்து இப்ப சினிமாவிற்கும் இடம்பெயர்ந்துவிட்டது இந்த டீலிங்க்..
ரோபோ எந்திரன் குட்டிப்பையன் பார்த்தான்.
பதிலுக்கு தோழன் இராமாயன் போகிறான். மீண்டும் கண்ணீர் விட்டு அழுகை.. ஓ இந்த பட்ஜெட் கட்டுபடியாகாதப்பா..:)

வானவில் இற்றைகள்*

பேசத்தொடங்கியதிலிருந்து ஹிந்தியே பேசிவந்த மகனுக்கு இந்த முறை தமிழ்நாட்டில் தமிழில் பேசியாக வேண்டிய கட்டாயம். விளையாட வரும் ஆட்களிடம் தமிழில் பேசினால் தான் வேலையாகும் என அவர் தமிழைப் பேச முயற்சி செய்யத்தொடங்கி .. மழலை வயது முடிந்த பின்பு மீண்டுமொரு மழலைக்குரல் கேட்கும்வாய்ப்பு எங்களுக்கு வந்தது.

’ நானெப்படி செய்வேன் இதை? நான் சின்னப்பையன் உங்களுக்கு ’தெர்லே’ ?

(இது என்ன மொழி புர்லே தெர்லே ந்னு ஹய்யோ)
----------------
வருது இல்லை - வரலை
டீவி கிடைக்குது இல்லை - சேனல் கிடைக்கலை

அக்கா சொல்றா இல்லை - அக்கா பதில் சொல்லலை
-------------------------


இப்பத்தானே டாஃபி சாப்பிட்ட திரும்ப ஏன் ப்ரிட்ஜை திறக்கிறே..?
‘எங்க’?(நெற்றிய சுருக்கியபடி கோவமாக, ஒரு இழுவையான ராகத்தோடும் வேகத்தோடும் )

எங்க- என்பது எப்போ, இல்லையே, நான் எப்ப சாப்பிட்டேன் என்று இடத்திற்கு ஏற்ப பொருள் படும்.
-----------------------
பேசுவது ஃபன்னி லேங்க்வேஜ் ‘பண்ணி’ லேங்குவேஜ் .. என்ன பண்றே .. நான் பண்ணிடுவேன். நான் அப்படி பண்ணிடுவேன்.. இப்படி பண்ணிடுவேன் என்று ஒரே வீரப்ரதாபங்கள்.

அடிக்கடி கண்ணாடியின் முன் நின்று பலத்தை சோதிக்கிறார்.
-----------------------

முடியெல்லாம் வகிட்டோரமா கொட்டுது (வயசாகுதுல்ல)
சரி கோணவகிடு எடுப்போம் (ஆமா ரொம்ப முக்கியம்) என்று செய்தபோது கண்ணில் பட்டது
அட ஒரு வெள்ளை முடி..(மற்றவை கண்ணுல படல இன்னும்)
பையர்-
’அம்மா நீங்க கொஞ்ச நாளில் அப்பா மாதிரி ஆகிடுவீங்க..’ (நிறைய வெள்ளை முடியாம்)
’அப்ப ரெண்டு பேரும் மேட்சா இருப்போம்ல டா..’
’இல்ல அப்ப அப்பாக்கு முழுசா நரைச்சிடும்’
அவ்வ்
’

------------------------------------
ஊரில் ஆளும்பேறுமாக இருந்துவிட்டு இங்கே ஒரு அறையில் தனியாக இருக்க பயப்படுகிறான் பையன்.
அம்மா கிச்சன்லயே எவ்ளோ நேரம் நிப்பீங்க... கால் வலிக்கும் வாங்க ரெஸ்ட் எடுங்க ..
அர்த்தம் - என் கூட டீவி பாருங்க..

அம்மா இத்தனை நேரம் கம்பூட்டர்ல வேலை செய்தீங்க இல்லை ரெஸ்டு எடுங்க படுத்து.
அர்த்தம்- இதே ரூமில் நான் கம்ப்யூட்டரில் விளையாடும் வரை படுத்திருங்க..
-------------------------------

அக்கா நீங்க லெமன் ஜூஸ் செய்து தர்ரீங்களா?
அம்மா கிட்ட லெமன் ஜூஸ் செய்து தாங்க லெமன் ஜூஸ் செய்து தாங்கன்னு கேட்டால் தரமாட்டேங்கறங்க..

அடே நீகூடத்தான் நல்லபையனா இருக்கே நல்ல பையனா இருக்கேன்னு சொல்றே ஆனா இருக்கியா இல்லைல்ல அது மாதிரி தான்..
---------------------------------------
வீட்டுப்பாடம் செய்யவாடா!
அதுல்லாம் ராத்திரி செய்தா தான் சஹியா இருக்கும் அம்மா (சஹி- சரி அல்லது பொருத்தம்)
-----------------------------
தம்பியின் பையனுக்கு பிறந்தநாள் கொண்டாட்டம்..
கண்ணைக் கட்டிய படி கழுதைக்கு (படத்துக்குத்தான்)சரியாக வாலை ஒட்டுவது தான் போட்டி.
மகளும் , தம்பி மனைவியும் நிகழ்ச்சி நடத்துபவர்கள். நான் புகைப்படம் எடுப்பவர்.
பையன் சியர் லீடர்.

தப்பாக வைக்கும் போதெல்லாம்..
‘ஆமா அங்க தான் அங்கயே தான்.. இல்ல ல்ல இங்க இங்க.. மேலே மேலே இல்ல கீழே கீழ தான் கரெக்ட் ஒட்டுங்க ’என்று எல்லாரையும் கிண்டலடித்து ஓட்டிக்கொண்டிருந்தார். அதுவும் மைக் பிடித்தபடி..

கடைசியில் ஆச்சி ( அப்பாவோட அம்மா) வந்தபோது பக்கத்துல நின்று கொண்டு கையை இவரே பிடித்துக் கொண்டுபோய் சரியான இடத்தில் காண்பித்து இங்க இங்க ஒட்டுங்க என்று உதவ எல்லாரும் ஓ ஓ ஓஹோ என்று குரலெப்பி சிரித்துவிட்டார்கள். வெக்கச்சிரிப்பு தவழவிட்டான் .
-------------------------------------------
மகள் தன் நடன வகுப்பு நோட்டை அலங்காரம் செய்ய வேண்டி என்னை உதவிக்கு அழைத்தாள். செய்து முடித்தபின் ..

“ அம்மா நீ ரொம்ப லக்கி”
“ஏன்மா”
“அடுத்த வருசமும் நடனம் (ஆக்டிவிட்டி வகுப்பில்) எடுக்கிறவங்களுக்கு புதுசா நோட் போடவேணாம்..இதேவச்சிக்கலாம்ன்னு சொல்லிட்டாங்க மேடம்..”
“ஙே’
‘நீ திரும்ப அலங்காரம் செய்ய உதவி செய்ய வெண்டியதில்லை பாரு அதான் சொன்னேன்’
-----------------------------------
பொள்ளாச்சியில் விடெக்ஸ் என்றவொரு சிறிய கடைக்கு நைட்டி வாங்கப்போயிருந்தோம். முதல் நாள் நாத்தனார் மகளுக்கு குடுத்துவிட வாங்கிய நைட்டி பிடித்துவிட்டதால் மகளுக்கும் வாங்கலாம் என்று அடுத்த நாள் கடைக்கு சென்ற போது கடையின் ஓனரம்மா (ஃபாத்திமா) மகளைப்பார்த்து ’நீ பாடுவியாம்மா. உன்னைப்பாத்தா அந்த ஏர்டெல் சூப்பர் சிங்கர் ல வந்த நித்ய ஸ்ரீ மாதிரியே இருக்கு ’என்றார்கள்.(நித்யாஸ்ரீ தான் பிடிக்காது இருந்தாலும்) அவர்களுக்காக ஒரு பாடலைப் பாடிக்காண்பிக்க சொல்லி அன்புத்தொல்லை. பாடிய பாட்டுக்கு ஒரு கர்சீப் பரிசு. ’பார்த்துக்கிட்டே இருப்பேன் இதுபோல ஒரு நாள் நீயும் டீவியில் பாடனும் சரியா? உன் பேரென்ன’ என்று கேட்டு வைத்துக்கொண்டார்கள்.

------------------
இற்றைகள்* - அப்டேட்ஸ்

வானவில் இற்றைகள்

சந்தனமுல்லையின் குட்டீஸ் பென் ஃப்ரண்ட்ஸ் அறிவிப்பின் மூலம் சபரிக்கு ஹரீஸ் என்கிற நண்பன் கிடைத்திருக்கிறார். அவருக்காக எதாவது படம் அனுப்பும்படி கேட்டிருந்தேன். எப்போதெல்லாம் சபரியின் கணினி நேரம் வருமோ அப்போதெல்லாம்

“இரு இந்த விளையாட்டுக்கு அப்பறம்” என்று என்னை திசை திருப்பிவிடுவான்.
பின் எப்போதெல்லாம் அவன் அக்காவுக்கோ எனக்கோ கணினி நேரம் வருமோ அப்போதெல்லாம்
“அம்மா , ஹரீஸ் ஃப்ரண்டுக்கு படம் வரையனும்ன்னு சொன்னியே எப்ப வரைய? “ என்று சாமர்த்தியமாகக் கேட்டுக் கொண்டிருப்பான். இருந்தும் எப்படியோ கொளுத்தும் வெயிலால் இந்த கோடை விடுமுறையானது வழக்கம்போல மே 15 தேதிக்கும் மேல் தொடங்கவேண்டியது இந்தமாதமே தொடங்கிவிட்டது. இதனால் ஹரீஷுக்கு படம் வரைந்து விட்டான்.

நிஜத்தில் தான் வெயில் கொளுத்துகிறது.இங்கே படத்தில் மழையும் வெயிலும் அடித்து வானவில்லும் வந்து விட்டது.


--------------------------------------------
விடுமுறை தொடங்கியது. வெயிலில் சிவந்து வந்து இறங்கும் குழந்தைகளைப் பார்க்க பாவமாகத்தான் இருந்தது. ஆனால் உண்மையில் நீதான்மா பாவம் என்று மகள் முதல் நாளே சொல்லிவிட்டாள். போர் போர் போர் என்று போர் தொடுப்பான் சபரி. அவனுக்கு காலையில் எழுந்ததுமே போர் அடிக்கத்தொடங்கிவிடும். கணினி விளையாட்டு, கார்டூன் இவற்றுக்கு நடுவில் இவனுடைய தோழர்கள் யாருக்கும் விடுமுறை இன்னும் கிடைக்காததால் அடைபட்டு கிடக்கிறான்.
மாலையில் பூங்காவில் சிறிது விளையாட்டு. வீட்டில் நடக்கும் பெயிண்ட்டிங் வேலைகளை மேற்பார்வையும் நடக்கிறது.

--------------------------------------------
டைக்வாண்டோ சேர்ந்து மூன்று மாதமாகிறது.
மஞ்சள் பட்டைக்காக (yellow belt) நடந்த தேர்வில் தனக்கு பாராட்டு கிடைக்கவில்லை என்று வந்து சொல்லிக்கொண்டிருந்தான். அன்றே கையில் பட்டை கிடைக்காததால் எனக்கு கிடைக்கவில்லை என்று மீண்டும் மீண்டும் சொல்லிக்கொண்டிருந்தான். மாஸ்டரிடம் விசாரித்ததில் B+ கிடைத்துள்ளதாகத் தெரிவித்தார்.
இந்த தேர்வுகளுக்கு முன்பே அக்காவின் வாயால் பாராட்டு கிடைத்துவிட்டது.

“அம்மா இவனை டைக்குவாண்டோ சேர்த்தே இல்லை. நல்ல வித்தியாசம் தெரியுதும்மா”
“அப்படியா ?”
”ஆம அடி நல்லா அழுத்தமா விழுதுல்ல”
---------------------------------------------------
நடன வகுப்பு ஆசிரியைக்கு முதுகு வலி என்பதால் வகுப்பு நின்று இருக்கிறது.
மற்றபடி அங்கே இருந்த பையன்கள் சிலர் வேறு நேரத்துக்கு மாறிப்ப்போய்விடட்தால். கோபியருக்கு நடுவில் இவர் ஹீரோ. இப்போது பம்பம் போலே பம்சிக்போலே பாட்டுக்கு பயிற்சி எடுக்கிறார்கள். நடனம் பயிலத்தொடங்கி நாலைந்து மாதங்களாகிறது. முன்பை விட இப்போது கலை கை வந்திருக்கிறது. (காலும் தான்) இருந்தாலும் டைக்குவாண்டோவுக்கு கிளம்புகிற வேகம் இங்கே இருப்பதில்லை.
-----------------------------
விடுமுறையில் தற்போது மூன்றெழுத்து ஆங்கில வார்த்தைகளை படிக்கிறான்.
MAN MAT இப்படி எதுவானாலும் முதல் இரண்டு எழுத்துக்களிலேயே முன் முடிவாக எதையாவது ஒன்றை சொல்லிவிடுவான். கடைசி எழுத்தைப் பார்க்காமலே அது மேனாகவோ மேட்டாகவொ இருக்குமென்று சொல்லிவிடுவார்.
-----------------------------------
யானை வரைய முயற்சி செய்து பின் அது கொஞ்சம் ரைனோசரஸ் போல இருக்கிறது என்று..
வேண்டாம் வேண்டாம் அழிக்காதே ஒரு கொம்பு மட்டும் வரைந்து ரைனொவாக்கிவிடறேன் என்று மாற்றிவிட்டான்.
அக்காவுக்கு தப்பாத தம்பி.
--------------------------------------------
மூன்று நாட்கள் ஆனதுமே 3 டேஸ் சொன்னே லீவு முடிந்துவிட்டதா? என்று கேட்கிறான். பாவம்
‘3 டேஸ் இல்லைம்மா 3 மந்த்ஸ் ந்னு இல்லை நான் சொன்னேன்’.. என்றால் வா ரயிலைப் பிடி தாத்தா வீட்டுக்குப் போலாம் இல்லையா ப்ளைனை பிடி மாமா ஊருக்குப் போகலாம். என்கிறான். ஆனா அக்காவுக்கு விடுமுறை ஆரம்பிக்காததால் நாங்கள் இன்னும் ஒரு மாதம் போர் கூட போர் தொடுக்கிறதுக்கான ஆயத்தங்களை செய்துவருகிறோம். இதற்கு நடுவில் அடிக்கடி குல்ஃபி , பெப்சி(திருமணவிழாக்களில் குடுக்கிறாங்களே) குடித்து நேற்று ஜுரம் வேறு வந்திருக்கிறது.
ஆனால் இப்போதும் குல்ஃபி கேட்கிறான்.
“நேற்று கூட தான் லேசா சளி இருந்தது அப்ப மட்டும் ஏன் வாங்கித்தந்தே?”
”அன்றைக்கு அழுதியே என்று பாவம் பார்த்ததுக்கு இன்றைக்கு நல்ல கேள்விடா மகனே!”

வானவில் இற்றைகள் -3

ஹோலி ஹை .. வானவில் வண்ணங்களின் தினம்.



அக்கா பத்தியும் கொஞ்சம் பதிவோம்..

தேர்வுகள் முடிந்து விடுமுறையின் தொடக்க நாளில் என்னவெல்லாம் செய்யவேண்டும் என்று பெரிய திட்டத்தோடு களத்தில் இறங்கி இருக்கிறாள்..

முதல் நாள் தையலில் ஓட்டுத்தையல் போட்டு ஒரு கோடு முடித்திருக்கிறாள்.

தமிழில் படிக்க இன்னும் கொஞ்சம் பயிற்சி எடுக்க எண்ணி மீண்டும் உயிரெழுத்து மெய்யெழுத்து உயிர்மெய்யெழுத்து என்று தொடங்கி ,போன முறை வாங்கிவந்த 5 ம் வகுப்பு (ஆங்கிலமீடியம் குழந்தைகளின் ஏடு)அறிவியல் தமிழ் புத்தகத்திலிருந்து பாடங்களை வாசிக்கத்தொடங்கி இருக்கிறாள். அறிவியலும் தமிழும் ஒரே நேரத்தில் அவள் அறிந்து கொள்வது மகிழ்ச்சியாக இருக்கிறது. வானவில் தோன்றுவது எப்படி? கூட அதில் வருகிறது :)

வீட்டில் நடக்கும் கட்டிட வேலைகளை கூர்ந்து கவனித்து, லெண்டர் போடுவது எப்படி ? நிறங்களை கலக்குவது எப்படி ? சுவற்றில் வண்ணமாக்குவது எப்படி? என்று அறிந்துகொண்டுவருகிறாள்.

இதில் ஒரு அறைக்கு மட்டும் எதிர் எதிர் பக்கத்துக்கு அடர்த்தியான வண்ணம் அடிக்க வேண்டும் என்கிற அவள் கோரிக்கையால் நல்ல சிகப்பு நிறத்தைத் தேர்ந்தெடுத்தோம் . அடித்து முடித்தவுடன் அதன் நிறம் முகத்தில் அடிப்பது போலவும் அதன் மணம் ஆளைத்துரத்துவது போலவும் இருப்பதால் .. தனக்கு கிடைக்கப்போகும் புது அறையில் அடர்த்தி குறைவான நான் முதலில் தேர்ந்தெடுத்த வண்ணத்தை அடித்துக்கொள்ள எண்ணி இருக்கிறாள்.

என்னம்மா ஒரு பக்கம் அடித்ததுமே பயம்மா இருக்கே- நான்
அதனால் என்னம்மா- மகள்
இல்ல இன்னோரு பக்கம் வேற அடிக்கனுமே
அடிச்சுக்கோ அதனால் என்ன நல்லாத்தானே இருக்கு
( அடிச்சிக்கோ என்றால் இது என் அறை இல்லையே என்கிற மாதிரி இல்லை சவுண்ட் ஆகிறது.. அவ்வ்)

இன்னும் திரைப்படப் பாடல்கள் சிலவற்றை பாடிப்பயிற்சி எடுப்பது , இசைவகுப்பு பாடல்களை தினமும் பாடிப் பயிற்சி செய்வது, மாலையிலிருந்து இரவு வரை பூங்காவில் ஆட்டம் மற்றும் கொஞ்சம் கான்ட்ம்பரரி நடன வகுப்பு செய்ய வேண்டியவைகளின் பட்டியல் நீளுகிறது.



தம்பியைப் பார்ப்போம்.
சின்னப்பையன் பதிவு படித்தீர்களா? இந்த நிறத்தினால் ஆன பாகுபாட்டை நாம் தவிர்த்தாலும் வெளியில் உள்ளவர்கள் எப்படியேனும் புகுத்திவிடுகிறார்கள். பெரியமானப்பிரச்சனையாகிவிடுகிறது.
தன் நெருங்கியதோழன் பரிசளித்தது என்பதால் அன்போடு பயன்படுத்தத்தொடங்கிய பிங்க் நிற தண்ணீர் பாட்டிலை இனி கொண்டுபோகமாட்டேன் பழய ஆரஞ்சு பாட்டிலை ஜெயந்தி ஆண்ட்டி வரும் போது கழுவி வாங்கிவை என்று சொல்லிக்கொண்டிருந்தான். மறந்து போனேன் வழக்கம்போல.. தானே ஒரு நாள் ஆண்ட்டியிடம் கொடுத்து கழுவி வாங்கிக்கொண்டான்.
என்ன விசயம் என்று கேட்டால்..
’அது எனக்கு வேணாம் அது கேர்ள்ஸ் பாட்டில்
யாருடா அப்படி சொன்னா
என் ப்ரண்ட் சொன்னான்..’

நீதி உணர்ந்து ,
ஒருகுளியலறைக்கு நீலமும் மற்றொன்றுக்கு பிங்கும் அடித்துவிட்டோம்.
---------------------
அம்மா நீ என்னைத்திட்டறே..இது பேட் மேனர்ஸ்..
நீ தானேடா திட்டவைக்கறே..

ஹய்யா அம்மாவை பேட் மேனர்ஸாக்கிட்டேன்..


------------------
அப்பா : இன்னிக்கு மாதிரியே நாளைக்கும் நல்ல பையனா இருக்கனும்
பையன் : நான் எப்ப நல்லா இருந்தேன் இன்னிக்கு?
(நம்ம சொன்னா கூட அவன் ஒத்துக்கமாட்டான் போலிருக்கே)
-----------------------------

ஆச்சி தாத்தா தொலைபேசும் போது எப்படி இருக்கே என்று கேட்டா நல்லா இருக்கேன் நீங்க எப்படி இருக்கீங்கன்னு கேக்கனும் என்று சொல்லிக்கொடுத்திருப்பதால், அவங்க நல்லா இருக்கியா என்று கேட்கும் முன்பே..
நான் நல்லா இருக்கேன் நீங்க எப்படி இருக்கீங்க..?

--------------------------
தமிழை ஒழுங்கா பேசுடா என்றால் நாக்கு தமிழ் வராதுன்னு சொல்ரான்..
என்னோடதுக்கு 'நாவோடது' என்றும் சொல்வதுண்டு .
எதிர்வீட்டில் விளையாடிவிட்டு ஹிந்தமிழ் சில நேரம் இப்படி தெலுங்குத்தமிழாகிறது.
------------------
three letter வார்த்தைகளைப் படிக்க முயற்சி செய்கிறான். தன் பெயரை ஆங்கிலத்தில் எழுதுகிறான். லெட்டர்களின் உருவங்களை வைத்துக்கொண்டு நாங்கள் வார்த்தை உருவாக்கும் விளையாட்டு விளையாடுவது உண்டு.
-----------------------------------
before , after எண்களுக்கான ரயில் விளையாட்டை விளையாடி வருகிறோம்.
அவனுடைய எண் 54 என்று சொன்னால் முன்போ பின்போ எந்த எண் வேண்டும் என்று கேட்டுவிட்டு நான் எஞ்சினாகவோ அவன் எஞ்சினாகவோ ஆகி அந்த ரயில் ஸ்டேசனை விட்டு செல்லும். தவறாக சொன்னால் ரயில் கிளம்பாது.

வானவில் இற்றைகள் -2

எப்போவெல்லாம் நான் பாடம் படிக்கலாம்ன்னாலும் பையன் அம்மா எனக்கு போராகுதுன்னு சொல்வான். எத்தனை நாள் தான் விளையாட்டா பாடம் படிக்கிறது. அதனால் அப்பப்ப பாடம் படிப்பதும் தினம் கொஞ்சம் உக்காருவதும் கடமை என்று உணர்த்தப்பார்க்கிறேன் முடியவில்லை.

இன்றைய விளையாட்டு..
ஒன்று (இரண்டை மனதில் நினைக்கனும்) மூன்று ( நான்கை மனதில் நினைக்கனும்)
இப்படியே வேகமாக சொல்லனும்.. அவனும் அதை விளையாட்டு என்றே நினைத்து விளையாண்டு விட்டான்.

அடுத்த நம்பர் என்ன முன்னால் இருக்கும் நம்பர் என்ன என்பதை நிச்சயமாக விளையாட்டு என்று நம்ப மாட்டான். ஆனால் அதையே ஒரு கற்பனை கணினி விளையாட்டாக விளையாண்டோம். ஈஸி, மீடியம், ஹார்டு என்கிற மூன்று லெவல் இருக்கிறது என்றதும் அவனாகவே ஒரு கட்டத்தை காற்றில் க்ளிக் செய்துவிட்டு இப்ப ஹார்டு என்றான். என்ன ஒரு தைரியம் ம் பார்க்கலாம்.. 33_ , 46 _, 99 _ எல்லாவற்றிற்கும் சரியான பதில் சொல்லிவிட்டு இப்ப ஈஸி லெவல் எப்படி இருக்கும்ன்னு பார்க்கலாம் என்று காற்றில் க்ளிக்கினான்.
-----------------------------------------
கடையில் 5 மிட்டாய் கேட்டான். கடைக்காரர் ரவுண்ட் செய்ய 6 மிட்டாயாக குடுத்துவிட்டார்.
ஒன்றை வழியிலேயே சாப்பிட்டுவிட்டு.. பர்ஸில் 6 இருக்கா என்றான். அது எப்படி நீதான் ஒன்று சாப்பிட்டு விட்டாயே என்றதும் அப்ப எத்தனை இருக்கு என்று கேட்டான். நீயே சொல்லு யோசித்து என்றேன். ம்.. 5 இருக்கா ? என்று கணக்கு செய்து கொண்டான். அட கழித்தல் கணக்குக்கூட செய்ய ஆரம்பித்துவிட்டான் . :-)
------------------
ரிஷிகேசத்தில் இருந்தபோது குளிரின் காரணமாக மிட்டாய் தரவே இல்லை .அம்மா தில்லி போனபின்னாவது தருவியா என்றான். அங்கயும் குளிர்தான்ப்பா ..நோ ... என்றது..

’ஸ்.. ஏ மம்மி கபி சுதரேகி நஹி ‘ என்று சலித்துக்கொண்டான்.

நான் இவன் என்ன சொல்கிறான் என்று புரியாமல் முழித்தேன். மகள் சொன்னாள்.
அம்மா அவன் என்ன சொல்றான் தெரியுமா.. ’இந்த அம்மா எப்பவும் திருந்தவே மாட்டாள் ‘
:(

அது எதோ டோரிமான் கார்டூன் கேரக்டர் பையன் சேட்டை செய்வதற்கு சொல்வதாம்.

-----------------------------------

வானவில் இற்றைகள் 1

வானவில் இற்றைகள் (அப்டேட்ஸ்?)

முன்பு புதுமொழின்னு ஒரு பதிவு போட்டிருந்தேன்.. இப்பவும் சில புதுமொழிகள் பேசுவார் எங்க பையன். தமிழும் ஹிந்தியும் கலப்பதும் அவருக்கு இன்னும் ப்ரச்சனையாகவே இருக்கிறது. இது இப்பத்தைய புதுமொழி.
வாக்கியத்தில் அமை:
மோசம் - வாசம்( மோந்து/முகர்ந்து பார்க்கும் வாசம்)
புஸ்ஸா= குஸ்ஸா( கோபம்)

1. மோசம் பாத்தேன் இது பூஸ்ட் ..அம்மா நான் டீ இல்லாட்டி காப்பி தான் கேட்டேன்.
2.அம்மா மிட்டாய் தரப்போறயா இல்லையா? எனக்கு புஸ்ஸா வரப்போது.
-------------------
மூணுசக்கர சைக்கிளில் ஒரு பந்தை பின்னால் கீழே அமிழ்த்தி வைத்துவிட்டு ...இது என்னடான்னா? ஸ்டெப்னி டயராம்..
----------------------------------

எதோ யோசனையில் ஆமாம்ன்னு சொல்ல நான் புரிச் புரிச் என்று சத்தம் மட்டும் செய்தேன்.. அம்மா என்ன சத்தம் அது?
எந்த சத்தம்?
புஸ் புஸ் ன்னுசத்தம் போட்டியே
ஆமாம்ன்னு சொன்னேன் அப்படி
ஓ புஸ் புஸ்.. :)
----------------------------
பெரியவனானதும் அதெல்லாம் பாத்துக்கலாம்டா
நான் தான் பெரிய்ய்ய்ய்ய்யவனாகிட்டேனே..
(குனிந்து காலிலிருந்து தலை வரை இரண்டு கையாலும் தடவியபடி )
--------------------------------------------------

கலரடிக்கிறேன்னு ஏண்டா எல்லத்தையும் வெளியே வரும்படி செய்யற ..மேடம் திட்டபோறாங்கன்னு சொன்னா..இதை நான் என்ன ஸ்கூலுக்கா கொண்டுபோகப்போறேன்..
வீட்டுல தான் சரியா வராது. அங்க எனக்கு நல்லா கலர் செய்யவரும்.
--------------------------------------
சபரி போதும்ப்பா விளையாடியது வந்து சாப்பிடு!!
குட் பாய் தானே!
ஆமா... ஆனா நீ விளையாட விடலை .. அதனால் பேட் கேர்ள்.
------------------------------
குளிக்கவான்னா ஓடுவார்.. தலையில் அழுக்கு இல்லை .. தலையில் ஊத்தாதே ப்ளீஸ் ப்ளீஸ் ... ஆயிரம் ப்ளீஸுக்கு அப்பறமும் தலையில் தண்ணிய என்னிக்காச்சும் ஊத்தும் ராட்சஸி நான்..
இரண்டு பொம்மைகளைக் குளிப்பாட்ட வா என்றதும் ஓடிப்போய் இரண்டு பொம்மையோட வருவான்.. அதற்கும் சோப்புப் போட்டு அழாமல் குளிச்சிட்டு வெளியே வந்து தானே உடைகளைப்போட்டுக்கொண்டு .. தயாராகிறார். ஒன்றாம் தேதியிலிருந்து பெரிய பள்ளிக்கு செல்ல இருக்கிறார்.
பஸ்ஸில் ஒழுங்காய் அமர்ந்து போவானா? மேமிடம் பணிவோடு இருப்பானா? கேள்விகள் கேள்விகள்....