முறிந்த உடன்படிக்கை

சாலை ஓர தவம் கலைத்து,
பின்பொரு புன்னகை.
மெளனமொழி பேசி முடித்து,
பின்பொரு உடன்படிக்கை.

தவங்களும், மௌனமொழிகளும்
உணர்த்தின காதல்.
நாட்காட்டி முழுதும்,
வர்ணஜாலம்.
முகம் பார்த்த நாட்கள்.


தவங்கள் குறைந்தது,
நிஜமொழி பேசினோம்.
காணாமல் போனது காதல்.
நாட்காட்டி முழுதும்
கருப்பு புள்ளிகள்.
போர்க்கள நாட்கள்.
ஓரோர் நியாயம்.
முறிந்த உடன்படிக்கை.

கால ஓட்டத்தில் ஓடி களைத்து,
ஓர் நாள்.
எதிர்பட்டோம்.

என் கையில் உன் செல்வம் .
உன் கையில் என் செல்வம்.
நிஜமொழி சொன்னது-
நீ நலமா? நலம்.
நீ நலமா? நலம்.
மௌனமொழி சொன்னது-
நலம் கேட்கும் நிலையானதே.

உடன்படிக்கையோ ,
நிஜமொழியோ இல்லாதிருந்தால்
நன்றாயிருந்திருக்கும்.