நாளெல்லாம் காதலர் தினமே...

நிச்சயமாகத் தெரியாத அன்பின் வடிவத்தை
கற்பனைக்கு கொண்டுவந்து
வளைத்து நெளித்து
உருவம் வரைந்து வைத்து..

உயிர் நிறமென்று மனதால் உருகி
ரத்த சிவப்பால் வண்ணம் தீட்டி

நீயேன்றும் நானென்றும்
வார்த்தைகளை வடித்து
முதல் சில வருடங்களைப்போல
அட்டையளிக்கவில்லை தான்.

புன்முறுவலும் புருவ நெறிப்பும்
விருப்பு வெறுப்பை
அளவிட்டு சொல்லிவிட
ஏதுவாகிவிட்ட நாட்களில்...
காதலின் பக்குவத்தை
கைப்பக்குவமாக்கி ,
சொற்கள் வடிவம்பெறுமுன்னே
செயல் வடிவமாக்கி
வானவில் வண்ணங்களை நாட்களுக்குத் தீட்டி
நானென்றும் நீயென்றும்
இல்லாமல்
நாமென்று வாழ்க்கை வடித்து

நாளெல்லாம் காதலர்தினமே! ....

(எல்லாருக்கும் வேலண்டைன்ஸ் டே வாழ்த்துக்கள்)