நீ வளர்ந்ததும் பெரிய மந்திரியா வரணும் !!

நமக்குத்தேவை நல்ல தலைவர்கள் என்று அவந்தி பதிவு போட்டிருக்கிறாள். ( தொடர்பதிவுக்கும் அழைத்திருக்கிறாள் ) உண்மை தான் ஆனால் எந்த வீட்டிலும் தலைவர்களை வளர்ப்பதில்லை. யாராவது என் குழந்தை அரசியலில் பெரிய மந்திரியா வரணும் என்று ஆசைப்படுகிறோமா என்ன? அரசியல் பாரம்பரியம் ஒரு ராஜ பாரம்பரியமாக குடும்பம் குடும்பமாக மட்டுமே வளர்கிறது. படிக்கின்ற வயசில் அரசியல் தேவையில்லை என்பதால் அரசியலா அதில் எல்லாம் ஒன்னும் கவனம் வைக்காதே என்று சொல்லி முடிப்பதற்குள் அவர்களுக்கு ஓட்டு போடும் வயசும் வந்துவிடுகிறது. நம்ம தமிழ்நாட்டிலிருந்து நடிகைகள் வருவதில்லை என்பது போல படித்தவர்கள் அரசியலுக்கு வருவது (அரசியல்குடும்பத்தினைத்தவிர) குறைவு.

மகளின் பள்ளியின் சேர்மென் (வய்து 87 ) இந்த காலத்தில் கல்வியும் அறிவும் மட்டும் முக்கியம்ன்னு நினைச்சு பெரியாளான பல அறிவாளிகளால் தான் பணவீக்கம் ,பொருளாதார பின்னடைவு எல்லாம் வருகின்றது. எதிலும் எதிக்ஸ் முக்கியமில்லை என்ற எண்ணம் . கல்வியோடு எதிக்ஸும் அவசியமென்று அவர்களை பழக்கவேண்டும் என்று கேட்டுக்கொண்டார்.

நாம் ஒவ்வொருவரும் சுயநலமாக நம் வீடு , நம் படிப்பு நம் வாழ்க்கை என்று வாழும் வரை சுயநல வியாபாரிகள் தான் அரசியலுக்கு வருவார்கள். அவர்கள் தங்களுக்கு போக மீதியைத்தான் தருவார்கள்.. அந்தகாலத்துத் தலைவர்கள் கொள்கையில் வேறுபட்டாலும் அடுத்தவர்களை எதிரியாகக் கருதியதில்லை. இப்போது நிலைமையே வேறு.

குறுக்குவழியில் பெரியவர்களாக ஆகவேண்டும் என்று கற்றுக்கொடுக்கும் நிலையில் , அடுத்த தலைமுறை நல்லமுறையில் வர வாய்ப்பே இல்லை. தன்னலமில்லா தலைவர்கள் வந்தாலும் கீழே இருப்பவர்கள் வரை நல்ல செயல்களை கொண்டு சேர்க்க தடையாக இருப்பது மக்கள் தானே..

எனக்குத் தோன்றுவதெல்லாம் .. உலகத்தில் நீ கொண்டுவர வைக்கவேண்டிய மாற்றத்தின் முதல் படியாக நீயே இரு என்ற காந்தியின் வார்த்தைகள் தான்.

---------------
தீவிரவாதத்துக்கு எதிராக என்னத்த சொல்வது வறுமை குறைந்தால் அதுவும் குறையும். காசு தான் கடவுள். காசு இல்லையா குடுப்பவன் கடவுள். இறப்பை வேறு எவரும் துச்சமாக மதிப்பதில்லை. காசில்லாதவன் தான் வாழ்ந்து என்னத்தைக்கண்டோம் என்று முதலில் நுழைகிறான்.

மதம் காரணம் என்கிறீர்களா? சகிப்புத்தன்மை இல்லாத, அன்பு இல்லாத எந்த மதமும் பின்பற்றி முக்திக்கு உதவபோவதில்லை.

சிலர் தாங்கள் போகும் இடங்களில் பாதுகாப்பு ஏற்பாடுகளுக்காக சோதனைகளில் சரியாக ஒத்துழைப்பு கொடுக்கிறார்களா? அதற்கு சலிப்பும் கோபமும்.. எத்தனை பேர் குறுக்குவழிகள் ஓடுகிறார்கள். என்றாவது எதாவது தவறாக நடந்தால் சோதனை சரி இல்லைங்க என்று குறை சொல்வார்கள்.

வரிசையில் நிற்க சங்கடம் , சோதனைக்கு ஒத்துழைக்க சங்கடம், தவறைக்கண்டால் தகவல் அளிக்க சங்கடம்.. நேர்மையாக இருக்க சங்கடம்.. மொத்தத்தில் வரும் சங்கடங்கள் எல்லாவற்றிற்கும் நாமே காரணம்.

இன்னும் புலம்புவதற்கு ,
நான் அழைக்கவிரும்புவது
ஆயில்யன்
தமிழ்பிரியன்
சென்ஷி
புதுகைத்தென்றல்
சந்தனமுல்லை
ராப்
விருப்பமானவங்க எழுதுங்க.. முடியாதவங்க சாய்ஸில் விட்டிருங்க...

சும்மா சமாளிபிகேஷன் போஸ்ட்...

தோழி ஒருத்தங்க வீட்டில் புதுமனைபுகுவிழா. எங்கு திரும்பினாலும் கட்டிடங்கள் எழும்பி நிற்கும் ஒரு உலகம். எத்தனை விதம் விதமாக வந்தாலும் எல்லாவற்றிலும் குடியிருக்க ஆட்கள் வந்தவண்ணமே இருக்கிறார்கள். முடிவுறா சாலைகள். முடிவுறா கட்டிடங்கள். காற்று நுழைந்து செல்லும் போது ராஜ கோபுரத்தை நினைவுப்படுத்துகிற கட்டிடங்கள். ஒரு ஊருக்கும் இன்னொரு ஊருக்கும் இடையில் முன்பெல்லாம் கொஞ்சமேனும் வெற்று நிலங்களும் , விவசாய நிலங்களும் பார்த்திருப்போம். இனி அப்படி பார்ப்பது சிரமம் என்று நினைக்கும் படி முடிவுறாமல் குடியிருப்புகள். ஹைவேக்களின் ஓரங்களெல்லாம் பளபளப்பான குடியிருப்பு வளாகங்கள்.


சிறிதே தாமதமாக வந்தவர்கள் , பூஜையில் தோழியும் அவள் மாமியாரும் அமர்ந்திருந்ததைப்பார்த்து , இது புதுவழக்கமா இருக்கிறதே. எங்கள் வீடுகளில் கணவனும் மனைவியும் தானே அமர்வது வழக்கம் என்றார்கள். வழக்கம்போல கணவன் மனைவி தான் பூஜை செய்தார்கள் . அதன்பின் தான் பூஜை செய்பவர் லக்ஷ்மி பூஜை ஒன்று செய்யவேண்டும் என்று சொல்லி பெண்களை அமர்த்தினார். இதில் இரண்டு பயன். லக்ஷ்மி வருகிறாள் என்றால் யாருக்குத்தான் பிடிக்காது.
மாமியாருக்கு முக்கியத்துவம் கொடுத்து வைத்ததாய் ஆகும்.



வெகுநேரமாக ஹோமப்புகை அதிகப்பட்டு தீ அணைந்துவிட்டது போலவெ ஆனதும் எல்லாருக்கும் உள்ளூரக்கவலை . அய்யா அது என்றதும் அவர் அதெல்லாம் கவலைப்படாதீங்க தானாவே அந்நேரம் சரியாகிடும் என்றார். இது என்ன நம்மைப்போலவே கவனிக்காமல் விட்டுவிட்டு சப்பை கட்டு கட்டுகிறாரோ என்று எனக்குத்தோன்றியது. ஆனால் அவர் சொல்லி வாய் மூடவில்லை சடாரென்று தீ நாக்கு ஒன்று புகைக்கு நடுவில் எழுந்தது. ( நான் எதாவது வேலையை பாதியில் விட்டுட்டு சமாளிபிகேஷன் செய்யும்போதெல்லாம் இப்படி எதும் நடக்க மாட்டேங்கிறதே)

------------------------------------------------------------
டெஸ்க்டாப் ல என்ன படமா? ஏம்ப்பா ஆயில்யன் இதெல்லாம் டேக்கா... நானெல்லாம் அடிக்கடி மாத்தறது இல்லை.. எப்பவோ கொஞ்ச நாள் முன்ன ஒரு சாமிப்படம் வைத்திருந்தேன். அப்பறம் இந்த புல்வெளியும் வானமும் வச்சது தான் மாத்தவே இல்லை.

நடுவில் ஒரு சொந்தக்காரப் பையன் வந்தான். சரி எதோ மெயில் பார்க்கனும் என்றதால் கொடுத்தேன். அப்பறம் ஊருக்கு கிளம்பிப் போனதும் கணினியைத் திறந்தால் .. எப்போதோ ஒரு நண்பர் அனுப்பிய படத்தை டைல் செய்து டெஸ்க் டாப்பில் வைத்துவிட்டு போயிருக்கிறார். இதெல்லாம் என்ன வேண்டாத வேலை என்று ஒரு பக்கம் கோபமாக வந்தது. படத்தை மாற்றும் முறையையே மறந்திருந்தேன் . மீண்டும் தேடி மாற்றி வைத்தேன். என் மொபைலில் தான் பெண்ணின் போட்டோ இருக்கும். பையனின் குரலில் அழைக்கும்.
யாரு இந்த டேக்கை தொடர விரும்புறீங்க ..?
எப்படியோ சமாளிச்சு ஒரு போஸ்ட் இன்றைக்கு போட்டுவிட்டேன்.

சினிமா சினிமா .. ஆன்ஸர் ஷீட்

இதுவரை வந்த சினிமா கேள்விபதில் பதிவுகளைப்பார்க்கும் போது எனக்கு பிரமிப்பா இருக்கிறது. வெட்டி ஒரு படி மேலே போய் 6 மாசத்துலயே சினிமா தியேட்டரில் கல்யாணம் பேசி முடிச்சிருக்கறதெல்லாம் நினைவுப்படுத்திச் சொல்கிறார்.. எனக்கு ஞாபகமறதி நிறைய. அதனால் என்னால் நினைவுப்படுத்தி சொல்லமுடிவது மட்டும் பகிர்ந்து கொள்கிறேன்.. அழைத்த ஆயில்யன் மற்றும் மை ப்ரண்டுக்கு நன்றி.

1. எந்த வயதில் சினிமா பார்க்க ஆரம்பித்தீர்கள்? நினைவுதெரிந்து கண்ட முதல் சினிமா? என்ன உணர்ந்தீர்கள்?

ரொம்ப சின்ன வயதிலும் படம் பார்த்திருப்பேன் . எனக்கு நினைவுக்கு வருவது பாலும் பழமும்(ரீலீஸ் ஆன காலமில்லங்க பழய படம் தியேட்டருக்கு திரும்ப வருமில்ல ) படத்தைப் ரயிலடி ஆச்சியைக் கூட்டிக்கிட்டுப்போனதா ஞாபகம். சுந்தரம் தியேட்டரில் எனக்கு உட்கார இடமில்லாம , சின்னப்பிள்ளைதானே நின்னுக்கிட்டேப்பார்த்தமாதிரி கலங்கலாத் தெரியுது . பெரிய திரையில் படம் பார்ப்பது சிறுவயதில் பெரிய பிரமிப்பு தான். வீட்டிலும் வேறு சின்னத்திரை கிடையாது. ஒரு முறை எங்க பெரியப்பா என்னை தாய்வீடு படத்துக்கு கூட்டிச் சென்றார்களாம். எனக்கு ரஜினின்னா ரொம்ப பிடிக்கும். அதனால் எழுந்து சீட் மேல நின்னு கை தட்டினேனாம் .. ( என்ன கொடுமை இது மீரா ஜாஸ்மின் மாதிரி இருந்திருக்கேனே) வீட்டுக்கு வந்து ரஜினி மாதிரியே " புட்டு புட்டு வச்சிடுவேன்னு" ஆக்சனோட எல்லாரையும் மிரட்டினேனாம் . இன்னமும் எல்லாரும் அதை சொல்லி சிரிப்பது வழக்கம்.


2. கடைசியாக அரங்கில் அமர்ந்து பார்த்த தமிழ் சினிமா?

தில்லியில் தமிழ்ப்படங்கள் தமிழ்ச்சங்கத்தில் தான் பார்க்கவேண்டும் என்ற நிலை மாறி இப்போதெல்லாம் திரையரங்கிலும் வருகிறது. சமீபத்தில் பார்த்தது சிவாஜி ,தசாவதாரம்.

3. கடைசியாக அரங்கிலன்றிப் பார்த்த தமிழ் சினிமா எது, எங்கே, என்ன உணர்ந்தீர்கள்?
ஜெயங்கொண்டான் சிடியில் பார்த்தேன். படம் நல்லா இருந்தது. போன படத்தை விட ஹீரோ இந்த படத்துல நல்லா நடிச்சிருந்தார்ன்னு தோண்றியது. இயல்பான படமா இருந்தது போல இருந்தது. ஹீரோ எல்லாரையும் நல்லா அடிக்கிறார். ஆனா அதுல ரஜினி விஜய் மாதிரி அடிச்சா பறக்குறாங்கன்னு முதல்ல ஒரு இண்ட்ரோ காட்சி வராததால் .. இயல்பாவே அவன் கொஞ்சம் அடிக்கக்கூடிய ஆளுன்னு தோணும்படி இருந்தது என்று நினைக்கிறேன். தங்கச்சியா வந்த பெண் நல்லா நடிச்சிருக்கான்னு நினைச்சேன்.

4. மிகவும் தாக்கிய தமிழ்ச்சினிமா?

கருத்தம்மா ... அந்த படத்தை கல்லூரித்தோழிகளுடன் பார்த்தேன். கருத்தம்மா அவள் அப்பாவை குளிப்பாட்டி விடும் காட்சியில் அவர் மனசில் பழசை நினைப்பதும் .. கருத்தம்மாவின் அக்கறையும் கண்ணீர் சிந்த வைத்தது. தாக்கிய என்பதற்கு, மனசில் இடம் பிடித்த படம் என்றால்.. மணல் கயிறு , தில்லு முல்லு , இன்று போய் நாளை வா..இப்பவும் இந்த படங்களெல்லாம் சின்னத்திரையில் எப்பொழுது வந்தாலும் உட்கார்ந்து ரசித்து சிரிப்பேன்.. கூடவே மனப்பாடமாய் எல்லா வசனமும் சொல்லிக்கொண்டே ..:)

5.அ. உங்களை மிகவும் தாக்கிய தமிழ்ச்சினிமா-அரசியல் சம்பவம்?
தமிழ் சினிமா- அரசியலா? அப்படின்னா?

5-ஆ. உங்களை மிகவும் தாக்கிய தமிழ்ச்சினிமா-தொழில்நுட்ப சம்பவம்?


6.தமிழ்ச்சினிமா பற்றி வாசிப்பதுண்டா?
நிச்சயமாக .
புத்தகம் , நியூஸ் பேப்பரில் வரும் செய்திகளை படிப்பதுண்டு. ஆயில்யன் சொன்னதுபோல கிசுகிசுக்கள் யாரைக்குறிப்பிடுகிறது என்று மண்டை உடைய யோசிப்பது வழக்கம்.


7.தமிழ்ச்சினிமா இசை?
இந்த இசையைக் கேட்காமல் இப்பொழுதெல்லாம் ஒரு குழந்தை கூட வளருவதில்லை. முக்கியமாக இதான் முதல் இசை பயிற்சி. எப்பொழுதும் சினிமா இசையைக் கேட்பது என்பது ந்ம் வாழ்வோடு பின்னிப்பிணைந்து போயிருக்கிறதே.இன்னார் என்று இல்லாமல் எல்லா இசையமைப்பாளர் இசையும் ரசிப்பேன்.


8. தமிழ் தவிர வேறு இந்திய, உலக மொழி சினிமா பார்ப்பதுண்டா? அதிகம் தாக்கிய படங்கள்?

தொலைகாட்சி பெட்டி வாங்கிய காலத்திலிருந்தே பிறமொழி படம் பார்ப்பது என்பது பழக்கமாகிவிட்டது. பெங்காலி படங்கள் அந்த காலத்துப்படங்கள் பிடிக்கும். சத்யஜித்ரேயின் பதேர் பாஞ்சாலி பற்றிய "நிதர்சனத்தின் பதிவுகள் " என்கிற எஸ். ராமகிருஷ்ணனி ன் புத்தகத்தை அன்புடன் காட்சிக்கவிதைப்போட்டியின் போது பரிசாகக்கேட்டிருந்தேன். அது திரைப்படத்தைப்பற்றிய இன்னொரு கோணத்தை காட்டியது.
ரேபிட் ஃப்ரூப் பென்ஸ்,
பே இட் ஃபார்வேர்ட்,
நாட் ஒன் லெஸ் மனதை பாதித்த படங்கள்.
இது போல படங்கள் பார்க்க நேரிட்டால் அவ்வப்போது பதிவில் பகிர்ந்து கொள்வேன்.

9. தமிழ்ச்சினிமா உலகுடன் நேரடித்தொடர்பு உண்டா? என்ன செய்தீர்கள்? பிடித்ததா? அதை மீண்டும் செய்வீர்களா? தமிழ்ச்சினிமா மேம்பட அது உதவுமா?

எங்கம்மாவோட மாமா அந்த காலத்துல( ப்ளாக் அண்ட் ஒயிட் காலத்துல) கதை வசனகர்த்தாவா இருந்தாங்க.. எங்கமாமா சத்யராஜோட ப்ரண்ட் . பள்ளிக்கூடக்காலத்துல அவங்க சேர்ந்து சுத்தியிருப்பதா சொல்லி இருக்காங்க. அவர் கூடப்போய் போட்டோ எடுத்துட்டுவந்தாங்க. இப்பத்தான் நம்ம ப்ளாக்கர்ஸ் பலரும் சினிமாத்துறைக்குப்போறாங்க.. சினிமாத்துறை ஆளுங்க ப்ளாக்கர்ஸ் ஆகிறாங்க. :) தமிழ் சினிமாவுக்கு சினிமாவை பார்ப்பது தான் உதவின்னு நினைச்சு செய்துட்டுவரேன்.



10. தமிழ்ச்சினிமாவின் எதிர்காலம் பற்றி என்ன நினைக்கிறீர்கள்?
எதிர்காலம் பற்றி சொல்ல நான் காலக்கடிகாரமா வச்சிருக்கேன். இருந்தாலும் நல்லா ப்ரகாசமா இருக்கும்ன்னு தான் நினைக்கிறேன். சினிமா வந்த காலத்திலிருந்து இப்ப வரைக்கும் வளர்ந்து கிட்டேயும் தான் இருக்கிறது. எங்கயாவது சறுக்கினா எங்கயாவது உயர்ந்து கிட்டு பேலன்ஸ்டா கொஞ்சமா வளர்ந்துகிட்டு இருக்கு.


11. அடுத்த ஓராண்டு தமிழில் சினிமா கிடையாது, மற்றும் சினிமா பற்றிய சமாச்சாரங்கள், செய்திகள் எதுவுமே பத்திரிகைகள், தொலைக்காட்சி, இணையம் உள்ளிட்ட ஊடகங்களில் கிடையாது என்று வைத்துக்கொள்வோம்? உங்களுக்கு எப்படியிருக்கும்? தமிழர்களுக்கு என்ன ஆகும் என்று நினைக்கிறீர்கள்?

இனிமே எப்பவுமே வராது என்ற நிலைதான் கவலைப்பட வைக்கும். ஓராண்டு என்பது பெரிய விசயம் இல்லை . இதுவரை வந்த எத்தனையோ படங்கள் பார்க்காமல் விட்டிருப்போம். ஆனால் தியேட்டர் சம்பந்தப்பட்ட தொழில் செய்பவர்களைப் பொறுத்தவரையில் அது மிகக்கொடுமையானதாக இருக்கும்.

பின்.நவீனத்துவ கதாசிரியர் சென்ஷி
ஆங்கிலப்பேராசிரியை ராப்
என் குரு துளசி


இவர்களை கேள்விபதிலை தொடரும் படி கேட்டுக்கொள்கிறேன்.

கவிதையும் மலைச்சாரலும்

படித்ததில் பிடித்ததாமே ...பதிவுகள் வரிசையாக வந்து நின்று கொண்டிருக்கின்றன. என்னை என்னை என்று அவை கெஞ்சியும் கொஞ்சியும் அழைக்கிறது. கவிதைகள் தான் அடித்து பிடித்து முதலில் வந்து நிற்கின்றது. ஒன்று மயக்கம் தருகிறது இன்னொன்று யோசிக்கவைக்கிறது. சரி உங்கள் பின்னால் யார் கொஞ்சம் தள்ளுங்கள் என்றால் வெட்கப்பட்டபடி இரண்டு மூன்று சிறுகதைகள் கூடவே ஒரு அனுபவக்கதையும்.

குப்பையெல்லாம் ஒழுங்காப்போடனும் என்று எழுதிய
நட்சத்திரவாரப்பதிவு என்னவோ தான் பெரிய நட்சத்திரமானதாக நினைத்துக்கொண்டு நின்றது. இருந்தும் யோசித்ததில் கவிதையில் ஒன்றைத்தான் குறிப்பிடவேண்டும் என்று தோன்றியது
என்று நிகழ்தகவின்விதிப்படி தேர்ந்தெடுக்கப்பட்ட ஒரு கவிதை சிறகு பெற்ற மனது கவிதையும் இந்த நிகழ்தகவின்படி.. கவிதையும் அதன் மென்மைகாரணமாய் பிடிக்கின்றது.


சுற்றுலாப்பதிவுகளில் நானித்தால் பற்றி எழுதிய பதிவு கொஞ்சம் மனதுக்கு குளுமையானது என்பதாலும் இன்றும் அந்த மலைச்சாரலில் சென்று வந்ததை அடிக்கடி நினைவுக்கு கொண்டுவர அடிக்கடி எடுத்து படிக்கத்தூண்டும் பதிவு ...அதை கூப்பிட்டு உங்களுக்கு அறிமுகப்படுத்துகிறேன் . இரண்டு பதிவுகள் மட்டும் என்பதால் மற்றவர்களை தேற்றி அனுப்பிவிட்டு வருகிறேன்.

கண்மணி அழைப்புக்கு நன்றி...

நான் அழைப்பது ... கோபி..
காயத்ரி..
சென்ஷி.

புதியவானம் ...வானம்...வானம்...

எம்ஜிஆர் படம்ன்னா நினைவுக்கு வருவது உடனே அன்பேவா தான். ஏன்னா அதோடவசனக் கேசட் பக்கத்துவீட்டுல வச்சிருந்தாங்க.. கேட்டு கேட்டு மனப்பாடம் ஆகிப்போச்சு.. அந்த சாருக்கு (அவர் எனக்கு கெமிஸ்ட்ரி ட்யூசன் எடுத்தாரு கொஞ்சநாள் ) எம்ஜிஆருன்னா ரொம்ப பிடிக்கும். எப்பவும் வீட்டுல கேசட் எடுத்து படம் போட்டா கண்டிப்பா எம்ஜிஆர் படம் இருக்கும்.


அவர் படத்துல் பாட்டு எல்லாமே அருமையா இருக்கும் அவர் பாட்டுன்னா எனக்கு உடனே நினைவுக்கு வருவது ... புதிய வானம் புதிய பூமி தான்.. பிள்ளைக்கூட்டங்களைப்பார்க்கையிலே பிஞ்சுமொழிகளை கேட்கயிலே நல்லவர் எல்லாம் நலம் காண்பார் எனும் நம்பிக்கை பிறக்கிறது .....
.பழயபடம்ன்னா எங்க ஊருல கிருஷ்ணா தியேட்டர். மன்னாதி மன்னன் மாதிரி எம் ஜி ஆர் படம்ன்னா புதுப்படம் போற ஆசையோட போய் பார்ப்போம்.


மார்கழி மாசம் கோலம் போடறது திருவிழா அப்போதெல்லாம்.. இப்பவெல்லாம் இல்லை . இங்க தில்லியில் ஒரு 6 க்கு 6 புள்ளி வச்சி கோலம் போட்டாலே அதிசயம். அப்படி கிருஸ்துமஸ் கோலம் போட்டிட்டுருக்கும் போது தான் பக்கத்துவீட்டு சார் சைக்கிளில் வந்து இறங்கி எம்ஜிஆர் இறந்து போயிட்டாருன்னு சொன்னாங்க.. அந்த கிருஸ்துமஸ்ல சார் சந்தோஷமா வே இருக்கலை.

எங்கவீட்டுல எம்ஜிஆர் ரசிகர்கள் தான் அதிகம். சிவாஜின்னா அழுமூஞ்சின்னு வச்சிக்கிட்டோம். பாக்காம இல்ல பாகப்பிரிவினை
தில்லானா மோகனாம்பாள் இதெல்லாம் கூட மனப்பாடமா இருக்கும் தான். ஆனா கேசட் எடுத்தா சிவாஜி படம் எடுத்து பாக்கறதுமட்டும் இல்ல.
சினிமா தியேட்டர் இல்லாட்டி டிவி தான் சிவாஜிக்கு.
அவர் படத்துலயும் பாட்டெல்லாம் அருமைதான். உடனே நினைவுக்கு வருவது ..""எங்கே நிம்மதி எங்கே நிம்மதி அங்கே எனக்கோர் இடம் வேண்டும் ""


எங்க சித்தி வீட்டு சித்தப்பாக்கு சிவாஜி தான் பிடிக்கும் . சிவாஜி பத்தி சொன்னா கோபம் வரும் . போங்கடி உங்க எம்ஜிஆருக்கு அழத்தெரியுமா உடனே செவுத்தப்பாக்க திரும்பிக்குவார் இல்லாட்டி முகத்தை மூடிப்பார்.எங்க சிவாஜி மாதிரி நடிக்கத்தெரியுமான்னு கேப்பாங்க. ஆமா ஓவரா நடிப்பாரு சித்தப்பா.. ஒரு வார்த்தையை சொல்லனும்னா கூட புருவத்தை அசக்கி உதட்டை மடித்துன்னு அய்யோ போங்க சித்தப்பான்னு வம்பு வளப்போம்.


ஜெமினின்னா மிஸியம்மா தான் நினைவுக்கு வரும். டிரிம்மா வந்து வெடுக்குவெடுக்குன்னு பேசற சாவித்திரி கூட வம்பு செய்யற ஜெமினி. இல்லாட்டி யார் பையன் ஜெமினி. அய்யோ பாவமா உன் அப்பா பேரென்னடா என்றதும் என்அப்பா பேரா என் அப்பா பேரு மகாகனம் பொருந்திய ஸ்ரீமான் சுந்தராஜனு சொல்லும்போது
அந்த குட்டி பையன் வாயை அடைக்கமுடியாம திண்டாடுவாரே.. கொஞ்ச வருசம் முன்ன மைக் மோகன் முழிப்பாரே அதே மாதிரி இருக்கும் .
பாட்டுன்னா அவ்ரோடது நினைவுக்கு வருவது "சின்ன சின்ன கண்ணனுக்கு என்ன தான் புன்னகையோ "


இதென்ன திடீர்ன்னு இதெல்லாம் ஒரு அலசலும் கொசுவத்தியும்ன்னு கேட்டீங்கன்னா... மொக்கை டேக்காமே அதுக்கு காட்டாறு கூப்பிட்டுருக்காங்க..
யோசிக்காம போட்டாதான் மொக்கையாமே.. அட நேத்துக்கூட யோசிக்காமதான் லைஸ் மை பாதர் டோல்ட்மீன்னு எழுதினேன் அந்த பதிவு அப்ப மொக்கையில்லையான்னு கேட்டா... அருட்பெருங்கோ சொல்றாரு.."" அக்கா நீங்க எழுதுங்க வந்து படிச்சிட்டு மத்தவங்க சொல்லுவாங்க .அதுமொக்கையா? இல்லையான்னு ""
இது மொக்கதானே சொல்லுங்கப்பா..

சரி யாரைக்கூப்பிடுவது .... மங்கை நேத்து தான் ஒரு பதிவு போட்டாங்க இருந்தாலும் எனக்காக ஒன்று போடட்டுமே
தீபா படமெல்லாம் பாத்து கண்ணு சரியாகிடுச்சாப்பா வாங்க வந்து எனக்காக ஒரு பதிவு.
பதிவு போடறதுன்னா யோசிக்கறதுக்கு ஒரு நிமிசம் கூட வேணாம் எங்கள் தங்கம் சென்ஷீக்கு அவர் ஒரு பதிவு போடட்டும். எழுதிடுங்கப்பா எல்லாரும் .

எட்டு எட்டாம்

பதிவெழுத இப்போதைக்கு எதுவும் தோணாததால் எட்டு எட்டு என்று எல்லாரும் எட்டும் அந்த எட்டை போட்டு விடலாம் என்று எழுத ஆரம்பித்துவிட்டேன்.ராதா வும் காயத்ரியும் கூப்பிட்டு இருக்காங்க எட்டு எழுத சொல்லி.


1.என்னத்த சொல்றது , முதல் பாயிண்டே தடங்குது. எந்த வகுப்பிலும் பெயில் ஆகாம பெரிதா கப்பு வைக்காம படிச்சு பாஸாகி பெத்தவங்களுக்கு கவலை வைக்காம இருந்ததே சாதனை தான். பின்ன கை வலிச்சா பரிட்சையில் எழுந்து வந்துட்டா பாஸாகிறது பெரிய விசயம் இல்லயா. மதிப்பெண் நடுத்தரமா இருந்தாலும் எல்லா ஆசிரியர்கள் மனதிலும் இவ புத்திசாலின்னு ஒரு இமேஜ் ஏற்படுத்தி வச்சிருந்ததும் சாதனை தானே.



2.இன்னிக்கும் அதே ஊரில் இருக்கற பள்ளி கல்லூரி நட்பு வட்டத்தை நான் போய் தான் சேர்த்து வைப்பேன். ஊருக்கு போகும் போது அட்ரஸ் மாறிப்போனதை யாருக்கும் சொல்லாத சில தோழிகளைக்கூட போன் நம்பர் கண்டுபிடிச்சு பேசியோ நேரில் போயோ அசத்துவது , என் பழக்கம். நீ ஒருத்தி தான் எப்போவும் தொடர்பு கொண்டு பேசறடீ ன்னு வாங்க , அவர்கள்
வாழ்க்கையின் ஓட்டத்தில் வயதானவர்களா நினைக்க ஆரம்பித்திருந்தால் நான்போய் அவர்களை வருடங்களுக்கு பின்னால் அழைத்து சென்று இளமையாக்கிவிட்டு வருவேன் கணக்கிலடங்காதவர்களின் நட்பு வட்டம் ஒரு சாதனை.



3. இசை கத்துக்கனும்ன்னு தோண்றியதும் குரல் சரியில்லை என்று யோசித்துவிட்டு வயலின் பக்கம் ஒதுங்கினேன்.. இருமுறை உள்ளூர் தியாகராஜ ஆராதனை யில் நிகழ்ச்சி நிரலில் பேர் எல்லாம் போட்டு பத்திரிக்கைய் அடிச்சிருந்தாங்க மேடையேறி வாசித்தது ஒரு சாதனை..கேட்டவங்களுக்குத்தானே கஷ்டம் எனக்கென்ன..கல்லூரியில் ஒரு முறையாவது மேடையேறும் ஆசையும் வயலினால் நடந்தது. அதுவும் போட்டியில் கம்பி வாத்தியம் அப்படின்னு ஒரு பிரிவுக்கு ஆளே இல்லை .
அதுனால் போட்டி இன்றி முதல் பரிசும் கோல் டு மெடலும்...எப்படி.சாதனை தானே.



4, நல்லபடியா குழந்தைய வளர்த்துருக்கீங்க வளர்க்கிறீங்கன்னு சிலர் சொல்லும் படி வளர்த்துட்டு வரதும் நியாயமா நடந்துக்கணும்ன்னு நான் நினைக்கிறேன்னா அவங்களும் சிலருக்கு நியாயத்தை எடுத்து சொல்ற மாத்ரி ஒரு சிந்தனை உண்டாக்கி வச்சிருக்கேன்னா அது ம்.ஒரு சாதனையாத்தான் இருக்கனும்ன்னு நினைக்கிறேன்.. நீங்க தான் இந்த குழந்தோயோட அம்மாவான்னு பாராட்டு பெற்ற பல சந்தர்ப்பங்கள் ஆனந்தமான ஒன்று.(அப்படி ஒரு நாளும் நாம நம்ம அம்மா அப்பாக்கு குடுத்துருக்கமான்னு ஒரு கேள்வி உள்ள)



5.இங்க எழுதறதும் இத்தனை பேர் அத படிக்கறதும் ஒரு சாதனை தான்னு நினைக்கிறேன்...



6. அருணாவோட எட்டு படிச்சீங்களா அப்படி நானும் செய்திருக்கேன்.. குழந்தை அழுதான்னு பாக்கப்போய் பாத்திரத்தில் ஸ்டெரிலைஸ் பன்ணப்போட்ட பாட்டில் பாட்டில் மூடி ரப்ப்பர் எதுவும் கண்ணுக்கு தெரியாம தண்ணியோட அப்படியே ஆவியாகி வெளியே போனப்புறம் எங்கே அது ன்னு தேடி சாதனை புரிந்திருக்கிறேன்...பூரி செய்து விட்டு குறைத்து வைத்த அடுப்பை அணைக்க மறந்து எரிய விட்ட சாதனை.



7. பெண் 3 வயது இருக்கும் போது அவளை வைத்துக்கொண்டு தனியாக ரயிலில் போகாதே என்றார்கள். சரி என்று பெங்களூரிலிருந்து தில்லிக்கு ப்ளைட்டில் வந்தேன். கணவர் முன்னால் போனால் அப்படியே காலைப்பாத்துக்கிட்டே பின்னாடி போய் தான் பழக்கம்..நான் போய் தனியா செக்கின்பண்ணி ப்ளைட்டிலான்னு பயந்துட்டு புலம்பினேன்..நமக்கும் ஸ்போக்கன் இங்கிலீஸுக்கும் அத்தனை பொருத்தம். சென்னையில் கூட நம்மாளுங்க தமிழில் பேசமாட்டாங்க. ...உள்ள போய்ட்டு அங்க பைலட் யாராவது காக்பிட் பாக்கவரீங்களான்னு அறிவிப்பு செஞ்சதும் ஆங்கிலத்தில் தடால்ன்னு ஏர்ஹோஸ்டஸை கூப்பிட்டு நான் என் பொண்ணுக்கு காண்பிக்கனும்ன்னு சொன்னேன். அங்க போய் இதான் அதான்னு அந்த பைலட் சொல்ல சொல்ல அவர்கிட்டயும் தட்டு தடுமாறி பேசிட்டு கடைசில என் பொண்ணுக்கு தமிழ்ல புரியறமாதிரி சொன்னா கேட்டுட்டு அவரும் தமிழ் தான் அப்படின்னார்.



8.வேறென்ன சொல்றது ...சாய்ஸில் விடலாமா? இல்ல வழக்கம்போல கைவலிக்குதுன்னு சொல்லி பேப்பரை சீக்கிரமா மடிச்சு குடுத்துட்டு ஹாலை விட்டு முதல் ஆளா வெளிய போய்டலாமா / சரி தான் இல்லன்னா நான் நானா இருப்பது எப்படி? அதனால எட்டாவது எழுதலை.


இன்னும் யாராவது எழுதாம இருக்கீங்களா? நானே கடைசியில் தான் எழுதி இருக்கேன்.

அழகென்ற சொல்லுக்கு

அழகு தொடர் பதிவுக்கு வல்லி கூப்பிட்டு இருக்காங்க. எனக்கு உடனே தோன்றியது இதெல்லாம் தான் ,
1.அழகென்ற சொல்லுக்கு முருகா முருகன்னா அழகு..அழகுன்னா முருகன். வேறெதும் தோணும் முன்னே முருகனோட சிலை தான் நினைவு வருது அதுவும் எத்தனை எத்தனையோ முருகன் கோயில் போயிருந்தாலும் அருகில் இருந்து அடிக்கடி பார்க்கும் உத்தர சுவாமிமலை என்னும் மலை மந்திர் முருகன் கண்ணுக்குள் வரார். அதுவும் பாலபிஷேகம் சந்தன அபிஷேகம் பண்ணும் போது அந்த முகம் இருக்கே அத்தன வடிவு.

இதே மாதிரி தான் கோயிலில் அம்மன் சிலை பார்க்கும் போது சாமிகிட்ட வேண்டிக்கப் போனதெல்லாம் இல்லை. கண் பட்டுடும் போன்னு சொல்லிட்டு வருவேன். அளந்தெடுத்த நாசியும் ஒயிலான இடையும்..."சின்ன சிறு பெண் போலே சிற்றாடை இடை உடுத்தி சிவகங்கை குளத்தருகே ஸ்ரீதுர்கை சிரித்து இருப்பாள் " பாட்டு காதுக்குள் கேட்கும்.


2. அழகுன்னா குழந்தைகள் . குட்டியா இருக்கும் போது எல்லாமே அழகுன்னு சொல்லுவாங்க...ஆனா குழந்தைங்கன்னா எனக்கு ரொம்ப பிடிக்கும். சின்னதா இருக்கும் போது சித்தி வீட்டிற்கு போகும் போதே அவங்கள பாத்துக்கறது எல்லாம் செய்வேன்.
கொஞ்ச நாள் தில்லியில் வீட்டில் குழந்தைகள் காப்பகம் மாதிரி வைத்திருந்தேன். அவங்க செய்யறது ஒண்ணு ஒண்ணும் அழகு.
என் பொண்ணு சின்னவளா இருக்கும் போது வித விதமா அலங்கரிச்சு போட்டோ எடுப்பேன் . இப்போ பையன் குறும்பெல்லாம் வீடியோவில் பதிவு.. எப்பவும் ரெடியா இருப்பேன். வீட்டுக் குழந்தைங்கன்னு இல்லை எங்க குழந்தைகளப் பார்த்தாலும் சிரித்து விளையாடி மகிழ்வேன் .


கண்காட்டி சிரித்து,
உதடு சுழித்து ,
பிஞ்சு கரத்தால் அணைத்து,
தோள்மேலே தூளியாடி,
ங்கா உங்கா மொழி பேசி ,
பெற்றவளாய் சில நேரம்,
பிள்ளையாய் சில நேரம் ,
என்று எனை மாற்றும் ,
அள்ள அள்ளக் குறையாத ,
அழகுச் சுரங்கம்.


3.அழகென்றால் பெண்கள் தான் . பதின்ம வயது பெண்கள் அப்போ மட்டும் எங்கிருந்து அவ்வளவு அழகு அவங்களுக்கு வருமோ தெரியல . ஒவ்வொருத்தரும் ஒரு தேவதை தான். பசங்க சும்மா ஒன்னும் கிறுக்கு பிடிச்சு அலையரது இல்ல.. அப்புறம் வளைகாப்பு இட்டிருக்கும் பெண்கள் , அவங்க முகமும் வளையலும் ,சிரிப்பும் சந்தோஷமும் பார்க்கறவங்களைத் தொத்திக்கும்.

4. காடு மலை மழை வானவில் வசந்தம் பாலை இப்படி நிறுத்த முடியாம போய்க்கொண்டே இருக்கும் இயற்கை . இதுல எதச் சொல்ல எத விட .
ரீங்கரிக்கும் காடு அழகு ,
மேகம் தவழும் மலை அழகு ,
சில்லென்ற மழை அழகு ,
வந்து மறைந்தாலும் வானவில் அழகு ,
மலர் தூவும் வசந்தம் அழகு,
காற்றுக்கோலமிடும் பாலை அழகு.



5. அன்பு அழகுங்க... அழகு எல்லாம் அன்பாக இருக்காமலும் போகலாம் ஆனா அன்பு எப்போதும் அழகுதானே . பாருங்க கடல் கூட அழகு தான் ஆனா சுனாமி வரலாம் . மழை அழகு தான் ஆனா இடி வெள்ளம் கொண்டுவரலாம் . உண்மையான அன்பு எப்போதும் நல்லது மட்டுமே செய்யும் . அன்பா குணமா இருக்கறவங்க எல்லாரும் அழகானவங்க தான்.




6. முதுமையும் பாசமும் அழகு தாத்தா பாட்டி பேரன் பேத்திகளுடன் கழிக்கும் பொழுதுகளை கவனித்திருக்கிறீர்களா ? தனக்கு கிடைக்கும் சாக்லேட்டில் பாதி பகிர்வதும் ,
செல்லமான அரவணைப்பும் , தள்ளாடும் வயதில் தூக்கிவைத்து
கொஞ்சுவதும் , சட்டிப்பானை , கடை விளையாட்டும்
நட்பாய் கேரமும் ஆடும் போதும் கை கோர்த்து
வேடிக்கை பார்த்துக் கொண்டே சாலை யோரம் போகும் போது கவனியுங்கள் . வயதொத்தவர்களாய் இருவரும் மாறிப்போகும் நிலை அற்புதம்.


அடுத்து நான் அழகு சொல்ல அழைக்கும் பதிவர்கள்,

தம்பி சென்ஷி
தங்கச்சி காட்டாறு
குறைகுடம்