July 23, 2014

சிறுகச்சிறுக சேர்க்கும் கேள்விகள்

 
சிறுகச்சிறுக சேர்க்கும் கேள்விகள்

தொலைவுகளின் நீளத்தை
இரட்டிப்பாக்கவும்
இல்லாதாக்கவும்
ஒருசேர முடிவதென்ன கணக்கு ?

பாதம் பட்டறியாத
அறைகளின் துல்லியம்
கால்கள் அறிவதெப்படி?

சொல்லவிரும்பாப்
பொய்களுக்கு மாற்றாக
கரங்களுள் பொதிந்திருக்கும்
உண்மைகளின் பட்டியல்களை
விரல்விரலாக நீக்கியும்
கேட்டு வாங்கியும்
கிழித்துப்போடுவது என்ன விளையாட்டு?

வேரலென
சட்டென்று வளரும்
வருத்தமும் கோபமும்
பூத்து சிதறி மறைவதென்ன மாயம்?

வேரல் - மூங்கில்*
-------------------------------
 
புல்வெளிகள் கடந்து
நடைவேகத்தில்
உரையாடல்
 உலைக்களம் அடைந்தது
நினைவுப்பரிசாக 
அங்கே பரிமாறப்பட்டது 
கனன்று கொண்டிருக்கும் கோளம்
மீண்டு நடந்த ஒற்றைச் சுவடுகளை 
விழுங்கியதில்
அலையற்றுப்போனது கடல்
7

1 comment:

”தளிர் சுரேஷ்” said...

கேள்விக் கவிதை அருமை!வாழ்த்துக்கள்!